ԵԽԽՎ-ում Հայաստանի պատվիրակության անդամներ, ՀՀԿ-ական Նաիրա Կարապետյանը, Հերմինե Նաղդալյանը, ՕԵԿ-ական Մհեր Շահգելդյանը ձեռնպահ են քվեարկել Ռուսաստանին ԵԽԽՎ-ում մինչև ապրիլ ձայնի իրավունքից զրկելու վերաբերյալ բանաձևին:
Բանաձևն ընդունվել է 160 կողմ, 42 դեմ, 11 ձեռնպահ ձայների հարաբերակցությամբ: Ի դեպ, հայկական կողմից վատառողջ լինելու պատճառաբանությամբ քվեարկությանը չի մասնակցել Ստրասբուրգում գտնվող ՀՀԿ խմբակցության պատգամավոր Արփինե Հովհաննիսյանը։ Նույն պատճառաբանությամբ Ստրասբուրգ ընդհանրապես չեն մեկնել ԲՀԿ-ի, Հայ ազգային կոնգրեսի ներկայացուցիչները:
ԵԽԽՎ-ում հայաստանյան պատվիրակության նախկին ղեկավար Հովհաննես Իգիթյանի կարծիքով՝ ձեռնպահը ըստ էության նշանակում է նույն «դեմ»-ն է այն բանաձևին, որովհետև բանաձևը հաշվվում է «կողմ» ձայներով: Նրա դիտարկմամբ՝ Հայաստանի այս քայլն անհասկանալի է, և լավ կլիներ, եթե Հայաստանն այդ բանաձևին կողմ քվեարկեր․ «Այն պայմանները, որոնք դրված էին Ռուսաստանի առջև, ոչ միայն չեն կատարվել, այլև Ռուսաստանը իրեն կատարելագործել է: Ռուսաստանն ավելացրել է իր ագրեսիան Ուկրաինայի նկատմամբ․ այսինքն՝ այն բոլոր չափանիշենրը, որոնք Ռուսաստանը պետք է համապատասխանեցներ, չեն արվել, հետևաբար բոլոր երկրները պետք է քվեարկեին դրան համապատասխան»,- ասաց նա:
Բացի այդ, Իգիթյանը հավելեց, որ Եվրախորհուրդն այն տեղը չէ, որտեղ պետությունն է ներկայացնում իր շահը կամ տեսակետը՝ ամեն քվեարկող, քաղաքական խմբակցություն պետք է իր տեսակետն ունենա, բայց Հայաստանի դեպքում նույնիսկ դա այդպես չէ:
Դիտարկմանը, թե Ադբեջանի 6 հոգանոց պատվիրակությունը քվեարկել է հօգուտ Ռուսաստանի, Հովհաննես Իգիթյանը արձագանքեց․ «Դա պայմանավորված է այն հանգամանքով, որ վերջին ժամանակաշրջանում Ռուսաստանում տանում է պրո-ադրբեջանական քաղաքականություն զենքի հետ կապված, հայ-ադրբեջանական սահմանի լարվածությանը ոչ մի կերպ ՀԱՊԿ-ը չի արձագանքում, թեպետ ստանձնել է Հայաստանի անվտանգության երաշխավորի պարտավորությունը: Ինձ թվում է՝ սա է պատճառը։ Ադրբեջանը Ռուսաստանից նեղսրտելու և բողոքելու պատճառ չունի, ինչո՞ւ նրա դեմ քվեարկություն անի»,- ընդգծեց Իգիթյանը:
