Արգենտինայի հայ համայնքը ստորագրահավաք է կազմակերպել տեղական Canal 13 հեռուստաալիքով հեռարձակվող թուրքական «Հազար ու մի գիշեր» հեռուստասերիալի ցուցադրումը դադարեցնելու նպատակով։ Այս մասին գրում է թուրքական «Սյոզջյու» կայքը։
Հայ համայնքը հանդես է եկել հետևյալ հայտարարությամբ. «Ցավալի է, որ Հայոց ցեղասպանությունը ճանաչած երկրում 2015 թվականին, երբ աշխարհի հայությունը նշելու է թուրքերի կողմից իրականացված Հայոց ցեղասպանության 100-ամյա տարելիցը, թուրքական հեռուստասերիալ է ցուցադրվում։
Սա անամոթ քայլ է՝ իրականացված թուրքական լոբբիի կողմից, որի նպատակն է ստվեր գցել Ցեղասպանության 100-ամյա տարելիցի վրա։ Այս ամենը հերթական անգամ ցույց է տալիս, որ Թուրքիան, որը կրում է Ցեղասպանության ողջ պատասխանատվությունը, շարունակում է իր ժխտողական քաղաքականությունը»։
Ստորագրահավաքի կազմակերպիչները հույս ունեն, որ ստորագրահավաքի միջոցով կստիպեն Canal 13 հեռուստաալիքի ղեկավարությանը դադարեցնել հեռուստասերիալի հեռարձակումը։
