Այսօր Թուրքիայում լույս տեսնող հայկական «Ակօս» շաբաթաթերթի գլխավոր խմբագիր, հայ լրագրող, պատմաբան Ռոբեր Քոփթաշը թերթում հրապարակել է «Հրաժեշտ Ակօսին» խորագրով հոդված, որում հայտնել է գլխավոր խմբագրի պաշտոնը լքելու մասին:
Հոդվածում Քոփթաշը, ով ամուսնացած է Հրանտ Դինքի դստեր՝ Դելալ Դինքի հետ, պատմել է, թե երբ է առաջին անգամ ընթերցել թերթը, այնուհետև աշխատանքի անցել «Ակօսում» ու դարձել գլխավոր խմբագիր, ներկայացրել է թերթում աշխատելու տարիներին ծավալած գործունեությունը, այդ տարիներից մնացած լավ և վատ հիշողությունները։
«Էթյեն Մահչուփյանից ստանձնած այս պաշտոնն այժմ հանձնում եմ Էդվարդ Տանձիկյանին»,- ասել է Քոփթաշը։
Գլխավոր խմբագրի լիազորությունները վայր դնելու պատճառների մասին Քոփթաշն իր հոդվածում որևէ բան չի հիշատակել։
Նշենք, որ Հրանտ Դինքն ընկերների հետ «Ակօս» շաբաթաթերթը հիմնադրել է 1996 թվականին։ Թերթի առաջին համարը լույս է տեսել ապրիլի 15-ին։ Հրանտ Դինքի սպանությունից հետո 2007-2010թթ. գլխավոր խմբագիրը եղել է ներկայում Թուրքիայի վարչապետի գլխավոր խորհրդական Էթյեն Մահչուփյանը, իսկ վերջին 5 տարիներին այդ պաշտոնը զբաղեցրել է Ռոբեր Քոփթաշը։