Ես ապրիլի 24-ին կլինեմ Հայաստանում և կլինեմ Հայաստանում ոչ թե որպես անձ Ֆրանսուա Օլանդ, որովհետև ես եղել եմ Հայաստանում և շատ լավ ճանաչում եմ, այլ կլինեմ, որովհետև պետք է ներկայացնեմ Ֆրանսիան: Այս մասին երեկ Ֆրանսիայի հայկական կազմակերպությունների համակարգող խորհրդի՝ արդեն ավանդույթ դարձած տարեկան ընթրիքի ժամանակ իր ելույթում ասել է Ֆրանսիայի նախագահ Ֆրանսուա Օլանդը:
«Առաջին լրատվական»-ի հետ զրույցում ֆրանսահայ հասարակական գործիչ Արման Ավագյանը նշեց, որ ճաշկերույթին բացառիկ միջավայր էր ստեղծված, ներկա էր մոտ հինգ հարյուր հոգի, այդ թվում՝ Փարիզի քաղաքապետը, սենատորներ, նաև աջակողմյան կուսակցության ներկայացուցիչներ: Ներկա էր նաև Շառլ Ազնավուրը: Արման Ավագյանը մի քանի մանրամասներ ներկայացրեց ճաշկերույթից:
Օլանդը իր ելույթում դիմել է ֆրանսահայերին՝ ասելով. «Ձեր հավատարմությամբ և ձեր արժանապատվությամբ դուք հպարտանում եք և իմացեք, որ Ֆրանսիան էլ ձեզնով է հպարտանում»:
Միջոցառման ժամանակ Շառլ Ազնավուրը ֆրանսահայ կազմակերպությունների համակարգող խորհրդի կողմից պարգևատրվել է արիության մեդալով:
Օլանդը իր ելույթի առաջին մասում նախ խոսել է պատմությունից, Ցեղասպանությունից և ասել, որ հասկանում են հայերի ապրածը:
«Ֆրանսիան պաշտոնապես ճանաչում է Ցեղասպանությունը և ջանք չի խնայում իր կողմից աջակից լինելու հայերին: Ցավը հիշատակելը ոչ թե պետք է բաժանի, այլ համախմբի: Ժխտողականությունն անընդունելի է, և ամեն մի ժողովուրդ իր պատմությունն ընդունելով է, որ կարող է առաջ գնալ: Ֆրանսիան երբեք չի պարտադրում իր կարծիքը որևէ մեկին, բայց նաև հավատում եմ, որ ժամանակակից Թուրքիայում կան ձայներ, որոնք սկսում են գնալով էլ ավելի պայքարել երկխոսության, հասարակության կողմից ընդունման համար և հասնել նրան, որ Թուրքիան ընդունի իր պատմությունը, որովհետև նորմալ չէ, որ մինչև քանի տարի սահմաններ են փակ: Ֆրանսիան ցանկություն ունի, որ այդ սահմանները բացվեն, քանի որ այնպիսի մի տարածաշրջան է, որտեղ շատ բաներ կարող են կատարվել, բայց սահմանները փակ են»:
Արման Ավագյանը նշեց, որ Ֆրանսիայի նախագահն անդրադարձել է նաև Ղարաբաղի խնդրին և ասել, որ Ղարաբաղյան հակամարտության համար պետք է փորձենք ամեն կերպ լուծում գտնել: Խոսել է նաև այն մասին, որ Ֆրանսիան պետք է ավելի շատ ներդրումներ անի Հայաստանում: «Դիմում եմ ոչ միայն Ֆրանսիայում ապրող հայ գործարարներին, այլև ֆրանսիացիներին, որ պետք է օգնել Հայաստանին, որ մեր քույր երկիրն է»,- ասել է Ֆրանսուա Օլանդը: