Ադրբեջանի արտգործնախարար Էլմար Մամեդյարովի հետ հանդիպումից հետո ԵԱՀԿ Միսնկի համանախագահները հանդես են եկել աննախադեպ հայտարարությամբ՝ Ադրբեջանին կոչ են արել կատարել հակամարտության խաղաղ լուծման հետ կապված իր պարտականությունները:
Համանախագահներն ընդգծել են նաև, որ Հայաստանը պետք է միջոցներ ձեռնարկի լարվածությունը չեզոքացնելու համար:
«Առաջին լրատվական»-ի հետ զրույցում Բաքվի քաղաքական ինովացիաների և տեխնոլոգիաների կենտրոնի տնօրեն, ադրբեջանցի քաղաքական վերլուծաբան Մուբարիզ Ահմեդօղլուն ասաց, որ Մինսկի խումբը պարզապես նեղացած է Ադրբեջանից․ «Համանախագահները չեն ճանաչում Ադրբեջանի տարածքային ամբողջականությունը, և Ադրբեջանի ղեկավարությունը չի ցանկանում համանախագահներին կամ նրանցից մեկին հանդիպել Ադրբեջանի տարածքում: Ե՛վ Հայաստանը, և՛ Ադրբեջանը պարտավորություն ունեն ընդունելու համանախագահներին, նրանց հետ քննարկելու խաղաղ կարգավորման հարցը, այդ պատճառով էլ համանախագահները նեղացել են, նման հայտարարություն տարածել ու իրարանցում առաջացրել: Սա իմ կարծիքն է»:
Միևնույն ժամանակ, փորձագետը հավելեց, որ ավելի լավ կլիներ, եթե համանախագահները հայտարարության մեջ նշեին, թե կոնկրետ որ պարտականությունը չի կատարել Ադրբեջանը․ «Ընդհանրապես, համանախագահները վերջին շրջանում ավելի շատ են հայի տպավորություն թողնում, քան Սերժ Սարգսյանը: Օրինակ՝ Սերժ Սարգսյանը հայտարարում է, որ Աղդամը հայկական հող չէ, իսկ համանախագահներն այն հայկական են համարում, երբ այդ տարածքում հայկական ուղղաթիռ է թռչում: Համանախագահներն օբյեկտիվ չեն Ադրբեջանի նկատամամբ, իրականության զգացողությունը կորցրել են: Եթե իրենք կարծում են, որ այդկերպ պատերազմն են կանգնեցնում՝ սխալվում են, ավելի շատ են հրահրում»:
Մեր այն հարցին, թե հնարավո՞ր է՝ Ադրբեջանը հրաժարվի Մինսկի խմբից, եթե այդքան մեծ դժգոհություն ունի նրանց գործունեությունից․ «Մենք քննադատում ենք, հաջորդիվ ևս քննադատելու ենք: Այո՛, մենք դժգոհություն ունենք, և դա շատ օբյեկտիվ դժգոհություն է: Մինսկի խումբը չի զբաղվում ղարաբաղյան հակամարտության կարգավորմամբ, իրենք իբրև թե նպաստում են, որ պատերազմ չլինի, բայց հակառակը, ավելի են սրում իրավիճակը: Բայց չնայած դժգոհությանը, մենք երբեք չեն հրաժարվի ԵԱՀԿ Մինսկի խմբից: Մենք մեր մեթոդիկան ունենք. Ադրբեջանի նախագահը հանդիպել է Գերմանիայի կանցլեր Անգելա Մերկելի հետ, որի ընթացքում Մերկելը հայտարարել է, որ ուզում է միջնորդ լինի ղարաբաղյան հակամարտության խաղաղ կարգավորման հարցում: Հիմա էլ Ադրբեջանը Եվրամիության հետ բանակցություններ է վարում, որ հետ կանչի Ֆրանսիայի մանդատն ու այն հանձնի Գերմանիային»,- ասաց փորձագետը: