Մոտ երկու շաբաթ առաջ Moody’s վարկանիշային գործակալությունն իջեցրեց Հայաստանի վարկանիշը՝ Ba2-ից մինչև Ba3՝ բացասական կանխատեսմամբ: Այս ցուցանիշի հիմքում Հայաստանի արտաքին խոցելիությունն էր, մասնավորապես՝ Ռուսաստանից դրամական փոխանցումների կրճատումը, ինչպես նաև այս երկրի տնտեսության բացասական ազդեցությամբ Հայաստանի տնտեսության հեռանկարների վատթարացումը:
Սակայն դեռ ամիսներ առաջ միջազգային վարկանիշային Fitch Ratings գործակալությունը Հայաստանի առաջնային չապահովված բաժնետոմսերի վարկանիշները արտարժույթով և ազգային արժույթով հաստատել էր BB- մակարդակում՝ կայուն կանխատեսմամբ: Երկրի առաստաղը BB մակարդակում էր, կարճաժամկետ վարկանիշը արտարժույթով՝ B մակարդակում:
«Հերիթիջ ֆաունդեյշնը» ևս լավատեսական կանխատեսումներ չունի: Հիմնադրամի գնահատականներով՝ 2014թ.-ին նախագահը հեռացրեց մի քանի հայտնի բարեփոխումներ իրականացնողների և ձևավորեց նոր կաբինետ, որտեղ մտան պաշտոնյաներ, ովքեր հարստացել են կառավարության հետ կապերի շնորհիվ: Օրինակ՝ ֆինանսների նախարարի անունը երկար ժամանակ մամուլում քննարկվում էր կոռուպցիայի գործով:
Կոռուպցիայի մասով Հայաստանում լճացման իրավիճակին 2014թ.-ի դեկտեմբերին անդրադարձել է նաև «Թրանսփարենսի Ինթերնեշնլը» քաղաքական և տնտեսական վերնախավերի սերտաճման տեսանկյունից:
Այս կառույցների գնահատականներն ավելի բացասական դարձան հատկապես վերջին շրջանի արտաքին և ներքին տնտեսական զարգացումների ֆոնին: ՎԶԵԲ-ի կանխատեսումներով՝ 2015թ.-ին Հայաստանի տնտեսական աճը կլինի 0 տոկոս:
Չնայած այս ամենին՝ էկոնոմիկայի նախարարությունը 2015թ.-ի համար մի քանի առանցքային ծրագրեր է մատնանշել, որոնք կամ ընթացքի մեջ են, կամ կմեկնարկեն 2015-ի ընթացքում, մասնավորապես՝ «Լիդիան» ընկերության կողմից Ամուլսարի ոսկու և արծաթի նոր հանքավայրի շահագործումը, «Ֆրանկ Մյուլլեր» ընկերության կողմից ոսկու զտարկման գործարանի կառուցումը, «Մերիդիան» ազատ տնտեսական գոտում 120 տեղական և միջազգային ընկերությունների ներգրավումը, «Ինստիգեյթ ռոբետիքս» անօդաչու սարքերի արտադրությունը և ՏՏ ոլորտի ևս մի շարք ծրագրեր: Այս ծրագրերի իրականացման դեպքում, նախնական հաշվարկներով, նախատեսվում է 560 մլն դոլարի ներդրում և 2500 նոր աշխատատեղերի բացում:
Հայաստանի տնտեսության համար բացասական կանխատեսումների պատճառով դրսի որոշ ներդրողներ զգուշավորություն են ցուցաբերում և որոշ դեպքերում մի քանի ամսով հետաձգում իրենց գործունեությունը:
Իհարկե, վերոնշյալ գնահատականները մտահոգիչ են դրսի գործարարների համար, սակայն վերջին շրջանում նկատվում են դրամի կայունացման և ռուսական շուկայից դրական միտումներ, ինչը թույլ է տալիս դրսի ներդրողներին սպասել և դեռևս հույսեր կապել Հայաստանի հետ:
Սրան զուգահեռ, «Առաջին լրատվական»-ի տեղեկություններով, ռուս գործարարներն այս շրջանում սկսել են հետաքրքրվել Հայաստանում ոսկերչության, հատկապես ադամանդագործության ոլորտով, նրանց գրավում են այս ոլորտի արտոնությունները, ինչպես նաև Եվրոպայի, Թուրքիայի և այլ երկրների արտաքին շուկաների հետ համագործակցելու հեռանկարները: