Այսօր երեկոյան, երբ իշխանական ողջ վերնախավը Օպերայում մասնակցում էր բանակի օրվան նվիրված տոնական միջոցառմանը, դրսում բանակում խաղաղ պայմաններում զոհված զինծառայողների մի քանի ծնողներ էին պաստառներով կանգնած:
Նախագահի մուտքից հետո զոհվածների մայրերին առանց պաստառների ներս թողեցին, սակայն նրանք պատրաստվում էին ներսում ևս պարզել իրենց որդիների լուսանկարները և պատասխան պահանջել, թե ինչու մինչ օրս չեն բացահայտվել իրենց որդիների սպանության պատճառները:
Զոհված Արմեն Մուրադյանի հայրը՝ Հովսեփ Մուրադյան, որը օպերայի դահլիճ չէր մտել, «Առաջին լրատվական»-ի հետ զրույցում ասաց, որ այս օրով ուրախանալ իհարկե կարելի է, բայց միայն այն միտքը, որ մենք 20 օրվա մեջ 12 զոհ ունենք, արդեն մտահոգիչ է: «Իսկ ես՝ որպես սպանված զինվորի հայր, եկել եմ ձայնս բարձրացնեմ, որ իշխանությունը լսի, որ ամեն տարի խաղաղ պայմաններում 50 զոհ ունենալն աբսուրդ է: Դրա մասին պետք է մտածել, հետևություններ անել»,- ասաց զինվորի հայրը:
Նրա խոսքերով՝ այսօր մենք լավ բանակ ունենք, սակայն նույն բանակում ունենք թմրամոլներ, հարբեցողներ, որոնք ճնշում են շարքային զինվորներին, նվաստացնում են, ստորացնում: «Բանակի գերագույն գլխավոր հրամանատարը, որն այսօր Եռաբլուրում զարմացել էր այդ փաստի համար, պետք է ուշադրությույուն դարձնի դրա վրա, որովհետև այսօր անգամ մի զինվորի մահը մեր ազգի համար թանկ կորուստ է»,- ասաց Մուրադյանը: