Ստամբուլի քաղաքապետարանի երիտասարդական խորհուրդը հայկական, հունական և հրեական դպրոցներում սովորող աշակերտների խնդիրներով զբաղվող «Փոքրամասնությունների միավորում» է հիմնել։ Այս մասին գրում է թուրքական «Հյուրիյեթ» պարբերականը։
Ստամբուլի քաղաքապետարանի երիտասարդական խորհրդի նախագահ Սամեդ Աղըրբաշը հայտարարել է, որ նման կերպ իրենք փորձում են մեծացնել Ստամբուլում ոչ մուսուլման երիտասարդների ակտիվությունը, ինչպես նաև պաշտպանել փոքրամասնությունների 23 դպրոցներում սովորող աշակերտների իրավունքները։
Նշենք, որ այս պահին Թուրքիայում 16 հայկական դպրոց է գործում, որտեղ շուրջ 3000 աշակերտ է ուսանում։ Հայկական բոլոր դպրոցներն էլ գտնվում են Ստամբուլում։ Դրանց գերակշռող մասը տարրական են, կան նաև ավագ դպրոցներ։ Համեմատության համար նշենք, որ, օրինակ, 30 տարի առաջ հայկական դպրոցներում աշակերտների թիվը երկու անգամ ավել է եղել։
Թուրքիայի կառավարությունը վերջին շրջանում հայկական դպրոցներին զգալի ֆինանսական աջակցություն է ցուցաբերում, ինչը խոսում է ոչ թե թուրքերի՝ հայերի նկատմամբ բարյացակամ քաղաքականության մասին, այլ պարզապես Եվրամիությանն անդամակցության գործընթացի շրջանակներում Թուրքիային պարտադրվել են որոշակի դրույթներ, որոնցից մեկն էլ վերաբերում է փոքրամասնությունների կրթական իրավունքներին և դպրոցներին։