Այսօր Եռաբլուրում գեներալ Մանվել Գրիգորյանն անդրադարձավ այն ազատամարտիկներին, ովքեր դժգոհ են երկրում ստեղծված իրավիճակից. «Երբ դուք ազատամարտիկներին բերում եք քաղաքական դաշտ, անցնում եք թշնամու յանը: Ազատամարտիկները հարցեր ունեն՝ թող բարձրացնեն, հարցերի լուծումն էլ ստանան: Ոնց որ հիվանդ ախպեր կամ քուր ունենաս, սաղ օրը կանգնես ասես՝ աչքը կամ գլուխը ցավում ա, չի կարելի, չէ՞: Ժողովուրդն այսօր որոշ խնդիրներ ունի, պետք է լուծվեն, արվեն»,- ասաց նա:
Մանվել Գրիգորյանին լրագրողները հիշեցրին, որ ինքն էլ է ազատամարտիկ, բայց պատգամավոր է, զբաղվում է քաղաքականությամբ: Մանվել Գրիգորյանը ցնցող պատասխան տվեց. «Պատգամավոր եմ, բայց պատգամավորությունը և քաղաքականությունը ուրիշ բաներ են: Ես այսօր պատգամավոր եմ իմ ընկերների, ազատամարտիկների, երկրապահների, երիտասարդների, պատանիների հարցերը բարձրացնելու համար: Եվ եթե դուք որևէ մի բանից հասկանում եք, նայեք իմ աշխատանքն ինչքան ա, ինչ գործունեություն եմ ծավալել, ինչ աշխատանքներ… օրենքներ և այլն, և այդ օրենքները ոնց են գործի դրվել»,- զայրացած ասաց գեներալ Մանվել Գրիգորյանը:
Նրա կարծիքով՝ այն ազատամարտիկները, որոնք հայտարարում են, թե պետք է իշխանությունը հեռանա, փողոց են դուրս գալիս, նա ազատամարտիկ չէ: «Ազատամարտիկը էն տղերքն են, ովքեր զոհվել են, ով զենքը ձեռքը՝ ինձ, քեզ ստեղ պաշտպանում է, դու էլ տենց ազատ խոսում ես»:
Ազատամարտիկ չէ՞ Ռազմիկ Պետրոսյանը՝ դիտարկմանը Մանվել Գրիգորյանն արձագանքեց. «Ազատամարտիկ եղել ա, իսկ եթե դուրս է գալիս փողոց, ինչ-որ նման հակառակ բաների, ես, ո՛չ, նման ազատամարտիկների չեմ ճանաչում»:
Ռազմիկ Պետրոսյանն «Առաջին լրատվական»-ի հետ զրույցում նշեց, որ ազատամարտիկի տեղը ժողովրդի կողքին է, և եթե այս իշխանությունները ժողովրդին հանել են փողոց, ազատամարտիկներն այնտեղ պետք է լինեն, ոչ թե իշխանության կերակրատաշտի կողքին:
«Ազատամարտիկ բառը նշանակում է ազատության համար պայքարող: Հիմա եթե մեր երկիրը, մեր ազատությունն ու անվտանգությունը վտանգված են, ազատամարտիկների առաքելությունը որտե՞ղ է՝ իշխանության կողքի՞ն: Նույնիսկ սպարապետի ժամանակ մենք իշխանավորի կողքին չենք եղել, եղել ենք պետության կողմից: Հիմա եթե իշխանությունը և պետականությունը նույնացվում են, ցավալի է, մենք պետք է պետության և ժողովրդի կողքին լինենք, մենք այսօր արժանապատիվ ապրելու համար պայքարող ժողովրդի կողքին պետք է լինենք, ոչ թե նրան ստորացնող, արտագաղթ իրականացնող, ոչ թե ժողովրդին չքավորության աստիճան հասցրած իշխանության կողքին:
Այսօր բնակչության իննսուն տոկոսը արտագաղթի ճանապարհն է բռնել, մենք պետք է ունենանք զինվորի, ժողովրդի մասին մտածող իշխանություն, որ կամային հատկություն ունենա, որ խնդիրներ լուծելու կամք ունենա: Այսօր ամեն ինչ խառնվել է: Եթե Մանվել Գրիգորյանը կամ Ռազմիկ Պետրոսյանն են որոշելու, թե ով է ազատամարտիկ…
Մենք տարբեր պատկերացումներ ունենք. եթե Մանվել Գրիգորյանը գտնում է, որ իշխանության կողքին կանգնելով պետք է ազատամարտիկների անունը պահել, ես էլ գտնում եմ հակառակը՝ ազատամարտիկի տեղը ժողովրդի կողքին է, այն ժողովրդի, որ պայքարում է այն նույն նպատակների համար, հանուն որի տղերքը զոհվել են, իսկ տղերքը զոհվել են արժանապատիվ ապրելու, ոչ թե ստորացված ապրելու համար»,- ասաց ազատամարտիկը:
Նա նաև նշեց, որ եթե զոհվածներին սպարապետի գլխավորությամբ հանեն շիրիմից և հարցնեն՝ դուք ա՞յս ձևի հայրենիքի համար եք պայքարել, կասեն՝ ո՛չ:
«Ես ոչ թե հակադարձում եմ Մանվել Գրիգորյանին, այլ ասում եմ այն, թե ինչպես եմ պատկերացնում ազատամարտիկի տեղն ու դերը: Ռազմիկին ազատամարտիկ ճանաչել- չճանաչելը… որևէ մեկի ճանաչելու ոչ կարիքն ունեմ, ոչ էլ դրան սպասում եմ, իմ ազգն է ինձ ճանաչում՝ որպես զինվոր, իսկ ես էլ իմ առաքելությունը իմ կարեցածի չափով կարողացել եմ անել: Կարևորը ժողովրդի գնահատականն է»:
Մանվել Գրիգորյանի մշակած օրենքներից ազատամարտիկը չգիտեր, միայն նշեց՝ ո՞ւր է խորհրդարան, որ որևէ մեկը որևէ բան ասի, ասելու խնդիր չկա: ՀՀԿ-ն Բաղրամյան 26-ում ինչ որոշում է, այն էլ ընդունվում է: Նրա խոսքով՝ ո՞ւմ խոսացածն է լուծվել, որ իր խոսացածը բան փոխեր, ամեն ինչ որոշվում է Բաղրամյան 26-ում, ԱԺ-ում էլ դա հաստատվում է:
