Արիզոնայի համալսարանում, որտեղ հունվարի 15-ին Թուրք-ամերիկյան միությունների ասամբլեան (ATAA), Արիզոնայի թուրք-ամերիկյան միությունը (TAA-AZ) և Արիզոնայի համալսարանի թուրք ուսանողների միությունը (TUSA) «Օսմանցիներն ու հայերը. ուսումնասիրություն ապստամբության դեմ շարժման մասին» թեմայով համաժողով էին կազմակերպել, Արիզոնայի համալսարանի իրավաբան ուսանողների Հայոց ցեղասպանության հարյուրամյակի կոմիտեն մարտի 21-22-ը կանցկացնի «100 տարի անց. Հայոց ցեղասպանության մասին գիտաժողով»։ Այս մասին գրում է թուրքական լոբբիի TurkishNY կայքը։
Հակահայ համաժողովի բանախոսը եղել է «Ծովային կորպուսների» (Marine Corps) համալսարանի պրոֆեսոր, Ottomans and Armenians, A Study in Counterinsurgency («Օսմանցիներն ու հայերը. ուսումնասիրություն ապստամբության դեմ շարժման մասին») գրքի ամերիկացի հեղինակ Էդվարդ Էրիքսոնը, ով ակնհայտ թուրքամետ կողմնորոշում ունի և Ցեղասպանությունը ժխտող գիտնականների թվում է։
Ի պատասխան սույն համաժողովի՝ հայկական լոբբին նույն՝ Արիզոնայի համալսարանի Սանդրա Դեյ Օ’Քոների անվան իրավաբանական քոլեջում կանցկացնի երկօրյա գիտաժողով՝ նվիրված Հայոց ցեղասպանության 100-ամյա տարելիցին։ «100 տարի անց. Հայոց ցեղասպանության մասին գիտաժողովի» ընթացքում ելույթ կունենան հայտնի թուրք պատմաբան, գրող Թաներ Աքչամը և ամերիկահայ անվանի գրող, պրոֆեսոր Փիթեր Բալաքյանը։
Նշենք, որ 2015 թվականին ընդառաջ՝ թուրքական կողմն ակտիվացրել է Հայոց ցեղասպանության դեմ պայքարը տարբեր ճակատներում, այդ թվում և գիտական ուղղությամբ: Թուրքիան տպում է Ցեղասպանությունը ժխտող բազմալեզու գիտական գրականություն, անցկացնում տեղական ու միջազգային սեմինարներ ու գիտաժողովներ: Թուրքիան նաև ֆինանսավորում է միջազգային կարևորություն ունեցող համալսարաններում Ցեղասպանության փաստի ժխտմանն ուղղված քայլերը:
Բացի այդ, աշխարհի տարբեր երկրներում բնակվող թուրքերը՝ նաև Անկարայի միջամտությամբ, կազմակերպում են հակահայ ակցիաներ, միջոցառումներ: