Հոլանդական Լեյդեն քաղաքի կենտրոնական կայարանը փակ է ահաբեկչության սպառնալիքի պատճառով՝ հայտնում է NOS հեռուստաալիքը: Չորեքշաբթի օրը ոստիկանության տեղի բաժանմունքում հայտնել են, որ խոսքը կայարանում հայտնաբերված կասկածելի փաթեթի մասին է:
«Ներկայումս ոստիկանությունը փորձում է պարզել, թե ինչ կա փաթեթում,- նշել են իրավապահները:- Կայարանի շրջանում երկաթուղային երթևեկությունը ժամանակավորապես փակ է»:
Կայարանում աշխատում է հատուկ ռոբոտ, որը նախատեսված է պայթյունավտանգ օբյեկտների վնասազերծման համար: Ոստիկանության տեղի բաժանմունքում հայտնել են, որ այն պետք է ուսումնասիրի հայտնաբերված փաթեթի պարունակությունը:
Միաժամանակ, իրավապահ մարմիններում դժվարանում են պատասխանել, թե որքան կտևի այդ գործընթացը: Ներկայումս կայարանն ամբողջությամբ տարհանվել է, երկաթուղային երթևեկությունը՝ ժամանակավորապես դադարեցվել:
NOS-ի տեղեկությամբ՝ խոսքը աղբի պարկի մասին է, «որը կպչուն ժապավենով ամրացված է հարթակի սյուներից մեկին»:
Միաժամանակ, ոստիկանությունը սկսված հետաքննության շրջանակներում որոնում է փաթեթը կայարանում թողած անձին: «Խոսքը 20-30 տարեկան, 175-185 սմ հասակով տղամարդու մասին է,- նշել են իրավապահ մարմիններում:- Նա փաթեթը կայարանում է թողել տեղական ժամանակով 6:30-7:30-ի սահմաններում (Երևանի ժամանակով՝ 9:30-10:30-ին)»:
