Բելառուսը սկսել է վերադարձնել մայրենի լեզուն ռուսերենի տասնամյակների թագավորությունից հետո, գրում է The Guardian-ը: Այդ երկրի նախագահ Ալեքսանդր Լուկաշենկոն հիմնական դեր է խաղացել ռուսերեն լեզվի գերակա դիրքի հարցում, և հաջորդ տարիներին բելառուսերենը «մարգինալացված քաղաքական ընդդիմության» լեզու էր թվում, ասվում է հոդվածում:
Սակայն իր 20-ամյա կառավարման ընթացքում առաջին անգամ Լուկաշենկոն, ինչպես թվում է, փոխում է իր տեսակետը, և բելառուսերենի կրողները «ցնծության մեջ են», գրում է պարբերականը: Թերթը նշում է, որ բելառուսների 10%-ից ոչ ավել մասը հայտարարում է, որ առօրյայում օգտագործում է մայրենի լեզուն: Ե՛վ բելառուսերենը, և՛ ռուսերենը երկրում պաշտոնական լեզու են համարվում, բայց բնակչության միայն 23%-ն է խոսում առաջինով, ավելի քան 70,2%-ը՝ երկրորդով, նշվում է հոդվածում:
«Դժվար է առանձնանալ, երբ ձեզ մշտապես հիշեցնում են, որ ձեր ժողովուրդը Ռուսաստանի կրտսեր եղբայրն է, իսկ բելառուսական ամեն ինչը ձանձրալի է»,- թերթը մեջբերում է իր բելառուս զրուցակիցների խոսքը: Միայն վերջերս բելառուսերենի կուրսերը սկսել են տարածվել երկրում, նշում է պարբերականը:
