YouTube-ը լիովին հրաժարվել է դիտարկիչներում տեսանյութերի ցուցադրման համար հիմնական՝ Flash տեխնոլոգիայի կիրառումից։ Այս մասին հայտնում է The Verge-ը։ Flash-ի տեղը զբաղեցրել է HTML5 տեխնոլոգիան։
Մոտ 5 տարի առաջ Google-ը YouTube-ում Flash-ին ավելացրել է HTML5-ը։ Եթե օգտատերը ցանկացել է տեսանյութը ստանալ HTML5 ձևաչափով, պետք է անցներ YouTube.com/HTML5 հղումով։
Ընկերությունը HTML5-ը լռելյայն ստանդարտ չի դարձրել նրանում առկա որոշ սահմանափակումների պատճառով։ Դրանցից առավել կարևորներից է եղել Adaptive Bitrate (ABR) մեթոդի սպասարկման բացակայությունը։
ABR-ը թույլ է տալիս բուֆերացման ժամանակը կրճատել միջինը 50 տոկոսով։
Վերջին տարիներին շատ ընկերություններ սկսել են հրաժարվել Flash-ից, այդ թվում Microsoft-ն ու Google-ը։ Համարվում է, որ նման որոշումների պատճառը 2010-ին Սթիվ Ջոբսի բաց նամակն է։ Ջոբսը բացատրել է, որ ընկերությունը Flash-ը չի ներառում iOS բջջային հարթակ այն պատճառով, որ այն չափազանց դանդաղ է աշխատում, շատ էներգիա է ծախսում և մեծ թվով խոցելիություններ է պարունակում։
