Աղքատ երկրներում երեխաների պատվաստումների ֆինանսավորման համար Մեծ Բրիտանիայի կառավարությունը խոստացել է հատկացնել 1.5 մլրդ դոլար, իսկ ամերիկացի միլիարդատեր բարեգործ Բիլ Գեյթսը՝ 1.55 մլրդ դոլար: TASS-ի հաղորդմամբ՝ այս մասին հայտարարվել է երեքշաբթի օրը Բեռլինում Global Alliance for Vaccines and Immunisation (GAVI) Պատվաստման և իմունացման գլոբալ դաշինքի համաժողովում:
GAVI-ի համաշխարհային դոնորները պարտավորվել են ընդհանուր 7.5 մլրդ դոլար ուղղել աղքատ երկրներում փորլուծության, թոքաբորբի, հեպատիտ B-ի, կարմրուկի դեմ 300 մլն երեխայի իմունացման համար:
Բացի Մեծ Բրիտանիայից՝ GAVI-ի դոնորների թվում են Գերմանիան, որը 600 մլն եվրո է հատկացրել, ԱՄՆ-ը, Նորվեգիան:
Աշխարհի աղքատ երկրներում 20 երեխայից մեկը մահանում է ինֆեկցիոն հիվանդություններից՝ կյանքի առաջին 5 տարիների ընթացքում: GAVI-ն իր առջև նպատակ է դրել մինչև 2020թ. այդ հարաբերակցությունը կրկնակի կրճատել՝ մինչև 1-ը 40-ի: