ԱՄՆ նախագահի վարչակազմը 2016 թվականի բյուջեի նախագծում պաշտպանության համար 534 մլրդ դոլար է հայցել։ Նախագիծը Կոնգրեսին կներկայացվի հաջորդ շաբաթ։ Այս մասին հայտնում է TASS գործակալությունը՝ հղում անելով տեղի ԶԼՄ-ներին։
Վարչակազմի պաշտոնյաների տվյալներով՝ այդ գումարը 35 մլրդ դոլարով գերազանցում է սահմանված սահմանները։ 51 մլրդ դոլարը կհատկացվի Աֆղանստանում ռազմական գործողության ֆինանսավորման, ինչպես նաև Իրաքում և Սիրիայում ԴԱԻՇ-ի դեմ պայքարի համար։
Դեկտեմբերի 17-ին Օբաման ստորագրել է 2015 թվականի դաշնային բյուջեի մասին օրինագիծը, որում ռազմական կարիքների համար հատկացումները կազմել են մոտ 577 մլրդ դոլար, որից 63.7 մլրդ-ը կուղղվի Աֆղանստանում, Իրաքում և Սիրիայում ռազմական գործողություններին, ինչպես նաև իրաքյան բանակի և սիրիական չափավոր ընդդիմության ջոկատների նախապատրաստմանը։
Վերջապես՝ օրինագիծը պարունակում է հանրապետական սենատոր Ջոն Մաքքեյնի ուղղումը, որը սահմանում է արգելք ռուսական ՌԴ-180 շարժիչների գնման վրա։ Դրանք կիրառվել են ամերիկյան «Ատլաս-5» հրթիռների համար։
