Այսօր ՀՀ առողջապահության նախարարն ու ԵԿՄ վարչության նախագահ գեներալ Մանվել Գրիգորյանը հուշագիր ստորագրեցին, որն ուղղված է ազատամարտիկների ու նրանց ընտանիքների անդամների առողջական հարցերի կարգավորմանը: Երկու կառույցների ղեկավարներն էլ կարևորեցին հուշագրի ստորագրումը՝ վերհիշելով, թե պատերազմական տարիներին ինչ մեծ դեր ու նշանակություն են ունեցել բժիշկները, ինչ հսկայական օգնություն են ցուցաբերել վիրավորներին:
Գեներալ Մանվել Գրիգորյանն ընդգծեց, որ այսօր էլ, երբ դեռ դե ֆակտո պատերազմն ավարտված չէ, իրենք նոր սերնդին պետք է կրթեն համապատասխան բժշկական գիտելիքներով, վերապատրաստեն, որ, Աստված մի արասցե, անհրաժեշտության դեպքում նրանց գիտելիքներն ու փորձը կիրառելի լինեն:
«Որպես առողջապահության նախարար իմ պարտքն եմ համարում նշել, որ այս հուշագիրը հաստատում է այն մոտեցումներն ու հարաբերությունները, որոնք տարիներ շարունակ արդեն եղել են: Այս հուշագրով մենք հաստատեցինք այն մոտեցումները, որով կարող ենք հետագայում ավելի դյուրին օգնություն ցուցաբերել ազատամարտիկներին, նրանց ընտանիքի անդամներին նրանց համար դժվարամատչելի բժշկական գործընթացներում»,- իր հերթին ասաց առողջապահության նախարար Արմեն Մուրադյանը:
