Մեկ և կես ամիս հանգստանալուց հետո «Ուլիս»-ը մեկնել է Անթալիա՝ ուսումնամարզաական հավաքի: Նախատեսված են ստուգողական բազմաթիվ հանդիպումներ, ինչի նպատակն է ապահովել խաղացողներին նաև խաղային պրակտիկայով: Թիմի բաժնետեր Վալերի Հովհաննիսյանը մինչև «Ուլիս»-ի մեկնումն Անթալիա սելեկցիոն նպատակներով մեկնել էր Բրազիլիա: Իսկ ներկա դրությամբ Վալերի Հովհաննիսյանը թիմի հետ է: «Ուլիս»-ի մամլո քարտուղարության հարցազրույց է ունեցել ակումբի բաժնետիրոջ հետ:
-Առաջնության ընդմիջումից առաջ Դուք նշում էիք, որ թիմի կազմում փոփոխություններ են լինելու: Արդեն կարելի՞ է փաստել դա:
-Այո, ադրեն որոշ փոփոխություններ կան: Մասնավորապես մարզչական կազմին միացել են երկու նոր մարզիչներ, ովքեր հիմնականում կզբաղվեն ֆուտբոլիստների ֆիզկական պատրաստականությամբ և գլխավոր մարզչին կօգնեն նաև մարզումային այլ աշխատանքների ժամանակ: Երկուսն էլ երիտասարդ մասնագետներ են, ու նրանց պաշտոնապես մենք կներկայացնենք առաջնության վերսկսումից առաջ: Մենք ուժեղացնում ենք մարզչական կազմը, բնականաբար հավատալով, որ այս ամենը անմիջականորեն կազդի նաև խաղացողների պատրաստականության վրա:
-Դուք մինչև ուսումնամարզական հավաքի մեկնելը Բրազիլիայում էիք ֆուտբոլիստներ ընտրելու համար: Նոր ֆուտբոլիստներ կա՞ն թիմում:
-Ներկայումս մենք փորձարկում ենք բազմաթիվ ֆուտբոլիստների: Ես Բրազիլիայում հայտնի ու հեղինակավոր շատ ակումբներում եղա: Հանդիպեցի ճանաչված մասնագետների, գործակալների հետ: Դա չէր նշանակում, որ ես միանգամից 20 ֆուտբոլիստների հետ էի գալու Անթալիա: Մենք սկսել ենք համագործակցությունը բրազիլական թոփ ակումբների հետ, ու հիմա աստիճանաբար ֆուտբոլիստներ են գալիս հավաքին մասնակցելու համար: Ինչ-որ մեկը կմնա, մյուսը կհեռանա: Այսինքն՝ սովորական գործընթաց կազմը համալրելու համար: Կարծում եմ, որ մինչև առաջնության վերսկսումը նորից կայցելեմ մի քանի երկրներ՝ սելեկցիայի համար:
-Առաջնության առաջին հատվածի վերջին երեք տուրերում «ՈՒլիսը» երեք անընդմեջ պարտություն կրեց: Ճիշտ է թիմը առաջնության միանձնյա առաջատարն է, բայց մրցակիցները շատ մոտ են: Հիմա ի՞նչ առաջադրանք է դրված «Ուլիս»-ի առջև:
-Եվս մեկ անգամ նշեմ, որ այս թիմի կազմը հավաքագրվեց առաջնության մեկնարկից տասը օր առաջ: Պատկերացնու՞մ եք, թե դա ինչ է նշանակում՝ նավից պարահանդես տարբերակը այստեղ օգտագործելի է: Ֆուտբոլիստներ մարզավիճակը ցանկալի մակարդակին բերելը մենք ձգտում էինք իրականացնել առաջնության ընթացքում: Ֆիզիկական ու ֆունկցիոնալ պատրաստականությունն էլ այն չէր, ինչ որ պահանջվում էր: Եվ, բնականաբար, վաղ թե ուշ թիմը պետք է նահանջ ապրեր:
Շատ կարճ էր նաև մեր պահեստայինների նստարանը, ինչն էլ ազդեց մեր վերջին խաղերի վրա: Ինչ-որ ողբերգական բան ես այստեղ չեմ տեսնում: Լրիվ հակառակը՝ ես համոզված եմ, որ Հայաստանի բարձրագույն խմբի առաջնության հետագա ընթացքն էլ ավելի հետաքրքիր է լինելու: Վստահ ենք մեր ուժերին ու նախապատրաստվում ենք առաջիկա խաղերին:
-Հաշվի առնելով «Ուլիս»-ի արդյունքներն ու թիմի ներկայիս վիճակը՝ ի՞նչ առաջադրանք էր դրված թիմի առջև առաջնության մեկնարկից առաջ և ի՞նչ առաջադրանք է դրվելու հիմա:
-Առաջնության մեկնարկից առաջ մեր հիմնական նպատակը մրցանակային եռյակում տեղ զբաղեցնել էր: Այսինքն՝ Եվրոպա դուրս գալն էր մեր նպատակը: Բայց ախորժակը բացվում է ուտելիս: Կարծում եմ՝ իրեն հարգող յուրաքանչյուր ֆուտբոլիստ, եթե ընթանում է առաջին տեղում, արդեն այլ տեղի մասին չի մտածի:
Եթե ես հիմա ասեմ, որ մենք չենք ուզում չեմպիոն դառնալ, կխաբեմ: Մենք, իհարկե, հիմա հնարավորություն ունենք չեմպիոնական պայքարին մասնակցել ու այդպես էլ կլինի: Մենք շատ ենք ուզում դառնալ չեմպիոն, ու հուսով եմ, որ կդառնանք:
«Ուլիս» ՖԱ
Մամլո քարտուղարություն
Լուսանկարը՝ «Ուլիս»-ի մամլո ծառայության
