Հնդկաստանի վարչապետ Նարենդրա Մոդին ԱՄՆ նախագահ Բարաք Օբամայի հետ հանդիպման է գնացել սեփական անվամբ նախշազարդված կոստյումով։ Այս մասին գրում է The Times of India-ն։
Ինչպես ծաղրում է թերթը, դասագրքերում չկան հստակ կանոններ, թե ինչպես պետք է հագնվեն կառավարության առաջնորդները պաշտոնական միջոցառումների ժամանակ, սակայն Մոդին այդ հարցում մեկ քայլ առաջ է անցել։ Հնդիկ վարչապետի կոստյումի ուղղահայաց գծերը կազմված են եղել նրա անվան տառերից՝ «Նարենդրա Դամոդարաս Մոդի»։
Մոդիի ոճն արդեն քննարկումների առիթ է դարձել սոցցանցերում և գրավել ողջ աշխարհի ուշադրությունը։ Ոմանք նրան համեմատել են Եգիպտոսի նախկին նախագահ Հոսնի Մուբարաքի հետ, ով նման կոստյում է ունեցել։
Թերթը նշում է, որ դիզայներ Ռաակեշ Ագարվալի կոստյումը կարվել է Jade Blue ընկերությունում։ Մոդին այդ խանութների ցանցի երկրպագու է արդեն մոտ 20 տարի։ Այդ բրենդին է պատկանում Modi kurta լեյբլը։
Ավելի վաղ հաղորդվել էր, որ Հնդկաստանն ու ԱՄՆ-ը համաձայնեցրել են խաղաղ ատոմի ոլորտում համագործակցության մասին համաձայնագրի իրականացման պայմանները։
