Ճապոնիայում որոշվել է քարածխի արդյունահանման նոր հանք բացել, որի պահանջարկը կտրուկ աճել է «Ֆուկուսիմա-1» ատոմակայանում վթարի հետևանքով բոլոր ԱԷԿ-ների աշխատանքի դադարից հետո: Վերջին 37 տարում առաջին այդպիսի հանքը կբացվի այս գարնանը՝ Կուրիյամա քաղաքում՝ երկրի ամենահյուսիսային Հոկայդո կղզում: Այս մասին հայտնում է TASS-ը՝ հղում անելով արդյունահանող «Սապպորո դայիթի» ընկերությանը:
Անցած դարում Ճապոնիան ունեցել է հզոր ածխային արդյունաբերություն, իսկ հանքափորները համարվել են աշխատողների ամենաակտիվ և կազմակերպված խմբերից: Սակայն պահանջարկի անկումից հետո հանքերի մեծ մասը մինչև 1980թ. փակվել է, ինչն ուղեկցվել է բուռն հակամարտություններով ու հեռացումներով:
2011թ. գարնանը «Ֆուկուսիմա-1» ԱԷԿ-ում վթարից և դրա առաջացրած շոկից հետո Ճապոնիայում ոչ միայն դադարեցվել է բոլոր ատոմակայանների աշխատանքը, այլև մեծ կասկածներ են առաջացել միջուկային էներգետիկայի ապագայի հարցում ընդհանրապես: Ներկայումս անվտանգության կանոնների խստացումից և մանրամասն ստուգումներից հետո երկրում պատրաստվում են նորից մի քանի ատոմային էներգաբլոկ գործարկել: Սակայն դա պատրաստվում են անել չափազանց զգույշ և սահմանափակ քանակով:
Մինչ «Ֆուկուսիմա-1»-ի վթարը՝ ԱԷԿ-ները Ճապոնիայում տվել են սպառողական էլեկտրաէներգիայի մոտ մեկ երրորդը, սակայն, ըստ ամենայնի, այդպիսի մակարդակ մոտ ապագայում չի լինի:
Դա մեծացնում է հանքային վառելիքի պահանջարկը ջերմակայանների համար՝ ներառյալ քարածուխը: