Մոզամբիկում ջրհեղեղի զոհերի թիվը հասել է 117-ի։ Այս մասին հայտնում է բնական աղետների հարցերով ազգային ինստիտուտը՝ փոխանցում է TASS գործակալությունը։
Հաղորդվում է, որ տարերային աղետի հետևանքով անցած տարվա դեկտեմբերի վերջից ավելի քան 157 հազար մարդ է տուժել։ Իրավիճակն աստիճանաբար նորմալանում է։ Վերջին օրերին նոր հեղեղումներ չեն եղել, անձրևները շարունակվում են, սակայն ոչ այնպես ինտենսիվ և առանց ակնհայտ հետևանքների։
Երկրում ստեղծվել է օգնության ցուցաբերման 41 կենտրոն, որտեղ ապաստան են գտել ավելի քան 50 հազար մարդ։ Փրկարարական աշխատանքները դժվարանում են ճանապարհների ու կամուրջների կործանման հետևանքով։
Մոզամբիկում անձրևների սեզոնը սկսվում է հոկտեմբերին, ավարտվում մարտին, և ամեն տարի ջրհեղեղը հանգեցնում է բնակչության շարքում զոհերի և ավերածությունների։ 2013 թվականին տարերային աղետն ավելի քան 100 մարդու կյանք էր խլել, տուժել էին 250 հազար բնակիչներ։
