shamshyan.com-ի փոխանցմամբ`հունվարի 27-ին, ժամը 05:30-ի սահմաններում, ոստիկանության Գեղարքունիքի մարզային վարչության, ոստիկանության Մարտունու բաժնի և Հայաստանի քննչական կոմիտեի Գեղարքունիքի մարզային քննչական վարչության և նույն վարչության Մարտունու քննչական բաժնի աշխատակիցների կողմից ձեռնարկված բազմակողմանի օպերատիվ հետախուզական և քննչական գործողությունների և բացատրական աշխատանքների շնորհիվ ոստիկանության Գավառի բաժին է մեղայականով ներկայացել Գեղարքունիքի մարզի Լիճք գյուղի բնակիչ, 34-ամյա Արմեն Գորոյանը:
Ինչպես Մարտունիից հայտնում է Shamshyan.com-ը, վերջինս կասկածվում է երեկ՝ հունվարի 26-ին, Լիճք գյուղում իր մոտ եղած «Մակարով» տեսակի ատրճանակով կենցաղային հարցերի շուրջ ծագած վիճաբանության հետևանքով համագյուղացի, 35-ամյա Արթուր Իրիցյանին սպանելու մեջ: Փաստի առթիվ հարուցվել է քրեական գործ՝ ՀՀ քր.օր-ի 104 հոդվածի 1-ին մասի հատկանիշներով:
Ա. Գորոյանը քննիչի որոշմամբ ձերբակալվել է: Ձեռնարկվում են բացատրական աշխատանքներ՝ հանցագործության գործիք «Մակարով» տեսակի ատրճանակը հայտնաբերելու համար: Ֆոտոլրագրողը հայտնում է նաև, որ հանցագործությունը բացահայտելու համար մարզի ոստիկանապետ Ա. Ադամյանի գլխավորությամբ ստեղծվել էին մի քանի օպերատիվ խմբեր, որոնց աշխատանքները ղեկավարել են մարզի ոստիկանապետը, Մարտունու ոստիկանության պետ Կարեն Սերոբյանը և մարզի քննչական վարչության պետ Արտավազդ Ղազարյանը՝ Մարտունու քննչական բաժնի պետի հետ համատեղ:
Գյուղացիները shamshyan.com-ի հետ զրույցում ասում էին, որ սպանվածն ու սպանությունը կատարողն ամուսնացած էին, երկուսն էլ ունեին անչափահաս երեխաներ, իսկ Ա. Գորոյանը սովորել և ավարտել է Երևանի ֆիզիկական կուլտուրայի պետական ինստիտուտն ու զարմանում էին՝ ասելով. «Ֆիզկուլտ ինստիտուտն ավարտած տղա էր, վիճվել էին, թող մի թաթալոշ տար, պրծներ, ինչի՞ իզուր տեղը ձեռքերն արյունոտեց»:
