Կենտրոն և Նորք-Մարաշ վարչական շրջանների ընդհանուր իրավասության դատարանում Արմեն Բեկթաշյանի նախագահությամբ սկսվեց և ավարտվեց Սերգեյ Շ.-ի գործի դատական քննությունը:
Ըստ մեղադրանքի՝ 33-ամյա Սերգեյն աշխատել է Երևանի Խանջյան 20 հասցեում գործող Jose համալիրում՝ որպես բարմեն:
2014 թվականի մարտի 28-ին, ժամը 22-ից մինչև 23-ը նա պատրաստել է «կրակով ուղեկցվող ալկոհոլային կոկտեյլներ»՝ խախտելով սպառողների առողջության անվտանգության պահանջները:
Բարմենի անզգուշության հետևանքով կոկտեյլների պատրաստման ժամանակ կրակը նետվել է հաճախորդների՝ Արտուշ Հ.-ի ու Արամ Հ.-ի վրա՝ նրանց առողջությանը պատճառելով կյանքին վտանգ սպառնացող ծանր վնասվածքներ՝ ընդհանուր մաշկածածկույթի 30 տոկոսի չափով 1-ին, 2-րդ, 3-րդ աստիճանի բոցային այրվածքներ՝ ուղեկցված այրվածքային հիվանդությամբ :
Սերգեյ Շ.-ին մեղադրանք է առաջադրվել ՀՀ քրեական օրենսգրքի 279 հոդվածի 2-րդ մասի 2-րդ կետով:
Դատական նիստի սկզբում ամբաստանյալը հայտնեց, որ իրեն լիովին մեղավոր է ճանաչում, զղջում է, ու միջնորդեց գործը քննել արագացված կարգով:
Մեղադրող Մանուկյանը և դատարան ներկայացած տուժողներից մեկը չառարկեցին: Վերջինս ասաց, թե որևէ պահանջ չունի ամբաստանյալից, նա հատուցել է պատճառած վնասը:
Մեղադրողը հայտնեց, որ դատարան չներկայացած տուժողը դեռ գործով նյութերի նախապատրաստման փուլում է հայտարարել, թե բողոք ու պահանջ չունի, քանի որ արարքը կատարվել է ոչ թե դիտավորությամբ, այլ անզգուշությամբ:
Հաշվի առնելով բացակա տուժողի՝ ավելի վաղ հայտնած դիրքորոշումը, նիստին ներկայացած տուժողի, ինչպես նաև մեղադրողի դիրքորոշումը՝ դատարանը բավարարեց ամբաստանյալի միջնորդությունը. գործը քննեց արագացված ընթացակարգով:
Հետազոտվեցին ամբաստանյալի անձը բնութագրող փաստաթղթերը:
Ամբաստանյալի շահերի պաշտպան Արթուր Ղարիբյանը գործին կցելու համար ներկայացրեց նոր փաստաթղթեր: Սերգեյ Շ.-ն ամուսնացած է, երկու անչափահաս երեխաների հայր է, ընդ որում՝ ավագ որդին հիվանդ է ու հաշմանդամության կարգ ունի:
Վատառողջ է նաև ամբաստանյալը: Զինվորական ծառայության ժամանակ ի հայտ է եկել, որ Սերգեյը սրտի արատ ունի, ու նրան զորացրել են՝ զինծառայության համար ոչ պիտանի ճանաչելով:
Սերգեյը նախկինում դատված չի եղել, բնութագրվում է դրական: Ներկայումս «Ջոս» համալիրում չի աշխատում:
Արտաքուստ հանդարտ ու համեստ, ցածրաձայն խոսող Սերգեյին նայելով՝ դժվար էր պատկերացնել, որ նա կրակի շիթերով «ուղեկցվող» կոկտեյլներ է պատրաստում…
Մեղադրող Մանուկյանն իր մեղադրական ճառում ասաց, որ չնայած հանցավոր արարքը անզգուշությամբ է կատարվել, բայց այն հանրային վտանգավորության բարձր աստիճան ունի, տուժել են երկու մարդ, բարի մյուս հաճախորդներին ևս վտանգ է սպառնացել:
Մեղադրողը միջնորդեց Սերգեյ Շ.-ին մեղավոր ճանաչել մեղսագրված արարքի համար ու դատապարտել… 2 տարի 6 ամիս ազատազրկման:
Տուժողն ասաց, թե պետք է նկատի առնել, որ ամբաստանյալի արարքի մեջ «միտում չի եղել», նրա խնամքին անչափահաս երեխաներ կան, այդ թվում՝ հիվանդ երեխա, ամբաստանյալի նկատմամբ պետք է մեղմ վարվել:
Տուժողի դեմքին այրվածքի հետքեր չկային, բայց աջ ձեռքին դեռևս պաշտպանիչ սպեղանի կար:
Ամբաստանյալի շահերի պաշտպանը կոչ արեց մեղմ պատիժ նշանակել իր պաշտպանյալի նկատմամբ, հաշվի առնել նրա երեխայի ու հենց նրա վատառողջությունը. «Եթե իմ պաշտպանյալն ազատազրկման դատապարտվի, նրա երեխաները կմնան առանց խնամողի, դա պատժի նպատակներից՝ սոցիալական արդարությանը բոլորովին չի նպաստի…»:
Պաշտպանը հիշեցրեց վճռաբեկ դատարանի նախադեպային որոշումը, համաձայն որի՝ եթե հանցավոր արարք կատարած անձը հարթում է պատճառած վնասը, հաշտվում է տուժողների հետ, դա արդեն նշանակում է, որ նա ուղղման ճանապարհին է: Սերգեյը հաշտվել է տուժողների հետ, հարթել է պատճառած վնասը, տուժողները բողոք կամ պահանջ չունեն:
Հանցավոր արարքը Սերգեյը կատարել է անզգուշությամբ՝ հանգամանքների պատահական զուգորդմամբ:
Պաշտպանը հիշեցրեց նաև, որ Սերգեյին մեղսագրված արարքի համար օրենքով, մինչև 5 տարի ազատազրկման ձևով պատժից բացի, սահմանված է նաև տուգանք՝ նվազագույն աշխատավարձի 300-500-ապատկի չափով:
Պաշտպանը միջնորդեց իր պաշտպանյալի նկատմամբ սահմանել տուգանքի ձևով պատիժ:
Ամբաստանյալն ասաց, թե զղջում է կատարածի համար ու դատարանից խնդրում է իր նկատմամբ ներողամիտ լինել:
Ընդհանուր իրավասության դատարանը Սերգեյ Շ.-ին մեղավոր ճանաչեց ու դատապարտեց 300 հազար դրամ տուգանքի: Ամբաստանյալից հօգուտ պետբյուջեի կբռնագանձվի նաև 16 հազար դրամ: