Ֆրանսիայի Բորդո քաղաքում դատական գործ է սկսվել L`Oreal կորպորացիայի համասեփականատեր Լիլիան Բետանկուրից միջոցների շորթման գործով: Այս մասին հայտնում է TASS-ը:
Բետանկուրը Ֆրանսիայի ամենահարուստ կինն է. նրա կարողությունը գնահատվում է ավելի քան 30 մլրդ եվրո:
Մեղադրյալի աթոռին են 10 հոգի, նրանց թվում՝ Ֆրանսիայի բյուջեի նախկին նախարար Էրիկ Վերտը, ով ավելի վաղ եղել է նաև Նիկոլա Սարկոզիի նախընտրական արշավի գանձապահը: Գործով բոլոր ամբաստանյալները մեղադրվում են Բետանկուրից խոշոր միջոցներ ստանալու համար՝ օգտվելով նրա տարիքից և թույլ առողջությունից: 2006թ. բուժզննությամբ պարզվել է, որ Բետանկուրը տառապում է ծերունական տկարամտությամբ: Հիմա նա 92 տարեկան է:
Խոսքը մեղադրյալների կողմից առձեռն և կտրոններով, արվեստի թանկարժեք գործերի տեսքով միլիոններ ստանալու, հսկայական գումարներով Բետանկուրի «բարեկամների» կյանքի ապահովագրության մասին է:
Առաջադրվել են վստահության չարաշահման, ֆինանսական միջոցների լվացման, ուրիշի ունեցվածքի ապօրինի յուրացման մեղադրանքներ:
Էրիկ Վերտից բացի՝ գործով որպես մեղադրյալ է անցնում նաև Բետանկուրի մտերիմ ընկեր լուսանկարիչ Ֆրանսուա-Մարի Բանյեն, ով նրա հետ ծանոթ է մոտ 40 տարի: Հետաքննությունը կասկածում է, որ Բետանկուրից նրա ստացած միջոցները հարյուրավոր միլիոն եվրո են կազմում: Մյուս հայտնի անձը Բետանկուրի նախկին գործադիր տնօրեն Պատրիս դե Մեստրն է: Նա 2012թ. արդեն 88 օր անցկացրել է նախնական կալանքի տակ:
Ավելի վաղ գործով մեղադրյալ էր նաև Ֆրանսիայի նախկին նախագահ Նիկոլա Սարկոզին, ով կասկածվում էր Բետանկուրից ստացած միջոցներով իր նախընտրական արշավի անօրինական ֆինանսավորման մեջ: Հետագայում նրա հասցեին մեղադրանքները հանվել են:
Ենթադրվում է, որ գործընթացը կտևի 5 շաբաթ: Սակայն պաշտապանութունը մտադիր է այն ավելի հետաձգել:
