Աշխարհահռչակ Deep Purple ռոք-խմբի երգիչ Իէն Գիլանը նամակով դիմել է Գյումրիի բնակիչներին՝ հունվարի 12-ի ողբերգության կապակցությամբ: Այս մասին հայտնում է «Մեդիամաքս» գործակալությունը:
Հունվարի 25-ով թվագրված նամակում ասված է.
«Հարգելի ընկերներ,
Ցանկանում եմ հայտնել անկեղծ ցավակցություններս հունվարի 12-ին Գյումրիում կատարված վայրագության կապակցությամբ:
Այդ քստմնելի և անիմաստ հանցագործությունը` Ավետիսյանների ընտանիքի սպանությունը, հոգիս ցավով և տխրությամբ լցրեց Գյումրիի ժողովրդի համար: Նրանք քաջ և սիրող մարդիկ են, որոնց հետ ես ուժեղ հոգևոր կապ եմ զգում:
Մի քանի օր փորձում էի խոսքեր գտնել, որպեսզի բացատրեմ ապրումներս, սակայն բառերը չէին գալիս: Այսօր, անցկացնելով այս խաղաղ կիրակի օրը Անգլիայի իմ տանը, վերջապես որոշեցի արտահայտվել, սակայն չեմ կարող առաջարկել ավելին, քան իմ սերը և բոլորիդ գրկելու ցանկությունը:
Սովորական մարդիկ ի զորու չեն հասկանալ, թե ինչպես կարելի էր նման կենդանական արարք գործել: Աղոթում եմ, որ իշխանությունները ճիշտ որոշումներ կայացնեն և արդարադատությունը ի կատար ածվի այնպես, որ հարգի անմեղ զոհերի հիշատակը, որոնց մենք հիշելու ենք հարգանքով և սիրով»:
Մեդիամաքս գործակալությունը հիշեցնում է, որ 1989 թվականին Իէն Գիլանը մասնակցել է Rock Aid Armenia (Ռոքն օգնում է Հայաստանին) բարեգործական նախաձեռնությանը, որի նպատակն էր օգնել 1988թ. երկրաշարժից տուժած Հայաստանին: Այնուհետև երաժիշտը մասնակցել է Գյումրիում երաժշտական դպրոցի բացմանը:
