Թուրքիայի վարչապետ Ահմեդ Դավութօղլուն հայտարարել է, որ քրդական հարցում լուրջ առաջընթաց է նկատվում։ Այս մասին գրում է թուրքական «Անադոլու» լրատվական գործակալությունը։
«Աստված վկա, թույլ չենք տա, որ քրդերի ու թուրքերի միջև բաժանում լինի»,- ասել է Դավութօղլուն։
Թուրքիայի վարչապետն ընդգծել է, որ իրենք նկատելի առաջընթաց են գրանցել քրդական հարցում, և փորձել է կոնկրետ օրինակով ցույց տալ, թե նախկինի համեմատ այսօր ինչ արտոնություններից են օգտվում քրդերը։
«1980-ականներին քրդերը ռադիո, երգեր լսելու համար հին, պապենական ժամանակներից մնացած ռադիոընդունիչներ էին օգտագործում։ Նրանք ստիպված էին լինում այդ ռադիոընդունիչների ալեհավաքի օգնությամբ որսալ Հայաստանում հեռարձակվող ռադիոալիքները։
Այսօր նման բան չկա։ Այժմ քրդերն իրենց սեփական հեռուստաալիքն ունեն, քրդական երգերը, եղբայրության մասին ժողովրդական երգերը հնչում են քրդական ռադիոյով։ Հայրենիքը չի բաժանվել»,- ասել է Դավութօղլուն։