Հայաստանի արտաքին գործերի նախարար Էդվարդ Նախբանդյանն այսօր լրագրողների հետ հանդիպմանը ասաց, որ Հայաստանի դիրքորոշումը Լեռնային Ղարաբաղի հակամարտության խաղաղ կարգավորման հարցում համահունչ է ինչպես Ռուսաստանի, այնպես էլ Ամերիկայի և Ֆրանսիայի դիրքորոշմանը. «Չեմ հիշում մի հանդիպում եռանախագահների հետ, որ ադրբեջանական լրատվամիջոցները բանակցությունների էությունը գլխի վրա շուռ չտան: Ադրբեջանի գործողություններին յուրահատուկ մի ոճ և տրամաբանություն է բնորոշ, որը հասկանալի է միայն իրենց»:
Նալբանդյանը հավելեց, որ Ադրբեջանի ղեկավարությունը փակուղի է տարել իր երկիրն ու իր քաղաքականությունը, հիմա այդ հիստերիկ գործողություններով փորձում է իրավիճակից դուրս գալ: «Որքան Ադրբեջանում սաստկանում են հետապնդումները քաղաքական ընդդիմախոսների նկատմամբ և այդ կապակցությամբ դատապարտող հայտարությունները միջազգային հանրության կողմից, Ադրբեջանը փորձում է սրել իրավիճակը հակամարտության գոտում: Ցավոք, Բաքվի իշխանությունների համար մարդկանց կյանքը ստորադասվում է ներքին քաղաքական շահերին, իրենք իրենց զինվորներին դիտում են որպես համակարգչային վիրտուալ զինվորիկների»,- ասաց ՀՀ արտգործնախարարը:
Ինչ վերաբերում է հայ-ադրբեջանական շփման գծի իրավիճակին և ՀԱՊԿ-ի արձագանքին, Նալբանդյանն ասաց, որ չի կարծում, թե պարտավոր է մանրամասներ ներկայացնել, միայն ընդգծեց, որ նման իրավիճակներում անհապաղ և մշտապես տեղեկացնում են և՛ ՀԱՊԿ-ին, և՛ ԵԱՀԿ-ին, և՛ ՄԱԿ-ին: «Դուք պետք է մանրամասն ծանոթանաք այդ փաստաթղթերին և նոր հարցեր տաք, մանրամասն ծանոթացեք ՀԱՊԿ-ի կանոնադրությանը և ձեր հարցերի պատասխանը կստանաք: Պետք չէ այնքան պարզունակ լինել ու ասել՝ մենք դիմեցինք, իրենք արձագանքեցին և այլն»,- նշեց նախարարը:
Լուսանկարը` PAN Photo-ի