Ոմանք փորձում են Մինվոդիում տեղի ունեցած դեպքը կապել Գյումրիի ողբերգության հետ, սակայն դրանք բացարձակապես կապված չեն իրար հետ: Այս մասին մեզ հետ զրույցում նշեց Ռուսաստանի հայերի միության Ստավրոպոլի տարածքային մասնաճյուղի ղեկավար Գեորգի Սաֆարովը:
«Ռուսաստանում ավելի շատ հայ է ապրում, քան Հայաստանում, և այստեղ մենք կողք կողքի ռուսների հետ ապրում ենք: Ինչ վերաբերում է այդ դեպքին, ապա դա պարզապես հարբած մարդկանց ծեծկռտուք է եղել, որն սկսվել է սրճարանում և նման ավարտ է ունեցել:
Ազգային հարց այստեղ չկա: Ո՛չ մեր նահանգապետը, ո՛չ իրավապահները հարցը նման կերպ չեն դնում»,- ասաց Սաֆարովը:
Նրա խոսքով՝ իրենց մոտ էլ կան տարբեր տեսակի ընդդիմադիր ուժեր, որոնք հավաքել էին մոտ 100 մարդու, եկել էին մարզի տարբեր քաղաքներից, փորձել էին փակել ճանապարհը, բայց հակահայկական արտահայտություններ չեն հնչել, հիմնականում քննադատել են իրավապահ մարմինների թույլ աշխատանքը:
«Հիմա արդեն ամեն ինչ հանգիստ է, մարդիկ աշխատում են, ոչ մի խնդիր չկա: Ոչ մի հակահայկական ակցիա չի եղել: Եղել է բողոքի ակցիա, որին մասնակցել է մոտ 100 մարդ, որոնք փորձել են փակել մայրուղին: Հակահայկական կարգախոսներ ու կոչեր չեն եղել: Բողոքն ուղղված է եղել վարչական և իրավապահ համապատասխան մարմինների դեմ»,- վստահեցրեց Սաֆարովը:
Հարցին, թե ինչպիսի՞ն էր Գյումրիի դեպքերի հետ կապված արձագանքը Ստավրոպոլի հայերի շրջանում, նա պատասխանեց. «Այնպես, ինչպես Հայաստանում: Մարդիկ այդ զինծառայողին հոգեկան հիվանդ են համարում: Մենք խելացի մարդիկ ենք և հոգեկան հիվանդի պատճառով չպիտի նեղանանք իրարից, դա ոչ մեկին ձեռնտու չէ»: