Մինվոդիի բնակիչները՝ ի նշան հատուկ ջոկատայինի սպանության դեմ բողոքի, հունվարի 24-ին հավաքվել էին «Օպերա» սրճարանի մոտ, որտեղ հունվարի 21-ի գիշերը զինծառայող էր սպանվել։ Կասկածյալը հայ է։ Այս մասին հայտնում է «Գորոդսկոյ տելեգրաֆը»։
Հավաքվածների մոտ են անհապաղ ժամանել շրջանային ոստիկանության ծառայողները։ Քաղաքային իշխանությունների ներկայացուցիչների հետ շփվելու մարդկանց պահանջն արհամարհվել է։ Ի պատասխան՝ վրդովված բնակիչները փակել են «Կովկաս» դաշնային մայրուղու հատվածը։
15 րոպե անց «Ռուսլան» շուկայի շրջանում երթևեկությունը դժվարացել էր։ Այնուհետև ցույցի մասնակիցներին ոստիկանները մղել են հետիոտնային հատված։ Մի քանի ցուցարարներ ձերբակալվել են։
Միջոցառմանը մասնակցել է 150-200 մարդ։ Այնտեղ են ուղարկվել ՆԳՆ հավելյալ ուժեր։ Ակցիայի մասնակիցների և ոստիկաների միջև տեղի է ունեցել ոչ մեծ ընդհարում։ Չարտոնված հանրահավաքն ավարտվել է։ Մարդիկ հոգնել են վարչակազմի ներկայացուցիչներին սպասելուց, ոստիկանները նրանց խնդրել են ցրվել։ Բոլոր ձերբակալվածներն ազատ են արձակվել։
Ինչպես ավելի վաղ տեղեկացրել էինք, Մինվոդիում ձերբակալել են զանգվածային ծեծկռտուքի ընթացքում ներքին զորքերի հատուկջոկատային Դմիտրի Սիդորենկոյի սպանության հիմնական կասկածյալ Միխայիլ Գրիգորյանին։ Նա արդեն խոստովանական ցուցմունք է տվել։
