Այսօրվանից Երևանի մի քանի երթուղիներ սպասարկող ավտոբուսները դադարեցրել են իրենց գործունեությունը: Մասնավորապես, երթուղի դուրս չեն եկել 11, 15,31, 32, 51 համարի ավտոբուսները:
Վարորդներից մեկն «Առաջին լրատվական»-ի հետ զրույցում ասաց, որ գործունեությունը դադարեցնելու հրահանգը տրված է քաղաքապետարանի կողմից:
«Առավոտյան մեր ղեկավարությունն ասաց, որ էլ չենք քշելու: Ասաց, որ քաղաքապետարանից ասել են՝ չեն կարողանում աշխատել, ծախսերի մեջ չեն տեղավորվում, պահեստամասերը թանկացել են և այլն»:
«Առաջին լրատվական»-ը խնդրի հետ կապված պարզաբանում խնդրեց Երևանի քաղաքապետարանի տրանսպորտի վարչության պետ Հենրիկ Նավասարդյանից, ով տեղեկացրեց, որ ավտոբուսների երթուղիներում շտկումներ են կատարվում և նույն երթուղին սպասարկող ավտոբուսներից մեկը հանվում է, թողնվում է մեկը:
«Այո, այս օրերին երթուղիների շտկման աշխատանքներ են կատարվում: Այսօր ուղևորները այնքան են պակասել, որ նույն ուղղությամբ անցնող ավտոբուս իմաստ չունի պահել, մեկը լիովին բավարար է»,-ասաց Հենրիկ Նավասարդյանը՝ հավելելով, որ առաջիկա օրերին մի քանի ավտոբուսների երթուղիները կդադարեցվեն: