Տավուշի մարզի ընդհանուր իրավասության դատարանում Ռաֆիկ Մելքոնյանի նախագահությամբ ավարտվել է Ռոման Գրիգորյանի գործի դատական քննությունը:
31-ամյա Ռոմանը մեղադրվել է տուժողի առողջությանը ծանր վնաս հասցնելու համար՝ ՀՀ քրեական օրենսգրքի 112 հոդվածի 1-ին մասով:
Տուժողը Ռոմանի համագյուղացին ու միաժամանակ ընկերն է՝ Աշոտը, ում ծնունդն ուրախ խնջույքով ու ընկերների պատվին հնչեցված կենացներով նշվել է դեպքի օրը՝ 2012 թվականի նոյեմբերի 1-ին:
Աշոտի ծննդյան օրը նշվել է նախ գյուղում, հետո ընկերները մեկնել են Իջևան, ապա իրենց գյուղ վերադառնալու ճանապարհին կանգ են առել խորհրդանշական՝ «Դրուժբա» անունը կրող ռեստորանի մոտ՝ լվացվելու:
Բայց «Դրուժբայի» մոտ հասնելու պահին արդեն Ռոմանը բարկացած էր «օրվա հերոսի»՝ Աշոտի վրա:
Բանն այն է, որ երկու ընկերները նստել էին «Ֆորդ» ավտոմեքենայի առջևի երկու նստատեղին:
Ճանապարհին բարձր տրամադրություն ունեցող Աշոտը ձեռքը մի քանի անգամ գցել է Ռոմանի «ուսով», բայց այդ «ընտանեվարությունը» բնավ դուր չի եկել Ռոմանին:
Նա դիտողություն է արել Աշոտին, իսկ երբ վերջինս շարունակել է ձեռքին «ազատություն տալ», վիճել է նրա հետ:
«Դրուժբայի» մոտ ընկերները տաքացել են այն աստիճանի, որ Աշոտին իրենից հեռու պահելու նկատառումով Ռոմանը մեկ անգամ արմունկով ուժեղ խփել Աշոտի ձախ կողքին:
Աշոտի առողջությանը պատճառվել է կյանքին վտանգ սպառնացող ծանր վնաս՝ կրծքավանդակի ձախ հատվածի փակ վնասվածք, որի հետևանքով զարգացել է ձախակողմյան պնևմոթորաքս:
Այսինքն՝ վնասվել է տուժողի ձախ թոքը ու զարգացել է պնևմոթորաքս:
Ռոման Գրիգորյանը, մասնագիտական եզրակացության համաձայն, հանդիսանում է «Անձի էմոցիոնալ անկայունության խանգարում» ախտորոշմամբ փսիխոպաթ անձնավորություն: Նա ճանաչվել է մեղսունակ:
Տուժողը նշել է, որ ամբաստանյալ ընկերոջ դեմ բողոք չունի, չի ցանկանում, որ նա ենթարկվի քրեական պատասխանատվության, որովհետև նա իր… ընկերն է:
Դատարանը Ռոման Գրիգորյանին մեղավոր է ճանաչել տուժողի առողջությանը ծանր վնաս հասցնելու համար՝ ՀՀ քրեական օրենսգրքի 112 հոդվածի 1-ին մասով:
Հաշվի է առնվել, որ Ռոմանն իր խնամքին երկու անչափահաս երեխա ունի:
Ռոման Գրիգորյանը դատապարտվել է 3 տարի 6 ամիս ազատազրկման:
Պատժի սկիզբը կհաշվվի Գրիգորյանին փաստացի կալանքի տակ առնելու պահից: