«Եթե խոսքը իրավական կուլիզիաների մասով է, այստեղ ես դժվարանում եմ մեկնաբանել, քանի որ այդ զինվորը գտնվում է Ռուսաստանի իշխանությունների ներքո, և, իմ կարծիքով, մի քիչ տարօրինակ կլիներ, եթե նրանք հանձնեին: Այստեղ ես ուրիշ հարց ունեմ՝ ի՞նչ էր անում մեր ոստիկանությունը, երբ պարզվեց, որ ամենաոստիկանացված երկիրն ենք, ամեն հարյուր հոգուն մեկ ոստիկան է բաժին հասնում Հայաստանում: Ո՞ւր էին այդ 30 հազար ոստիկանները, երբ պետք էր այդ հանցագործին բռնել: Երբ մերոնք ձերբակալեին նրան, տանեին Գյումրու ոստիկանության բաժին, այս հարցը չէր առաջանա»,- անդրադառնալով Գյումրիում տեղի ունեցած ողբերգությանը՝ «Առաջին լրատվական»-ի հետ զրույցում նշեց Քաղաքացիական հասարակության ինստիտուտ» ՀԿ նախագահ Արման Դանիելյանը:
Անդրադառնալով Գևորգ Կոստանյանի այն մեկնաբանությանը, որ դեռ դիմում չի գրել ՌԴ դատախազին, քանի որ հիմքեր չունի, Արման Դանիելյանը նշեց՝ դե թող չխոստանար, խոստացել է, թող անի:
«Տեսնում ենք, որ հանրային պահանջը ինչ-որ բաներ տեղից շարժում է. գոնե նեղություն տվեցին իրենց, զանգեցին, ցավակցեցին: Թե ինչքանով կգնան այդ պահանջների կատարմանը՝ չեմ կարող ասել, քանի որ մի քիչ դժվար է ռուսական իշխանությունների հետ ինչ-որ բանի մասին զրուցելը. նրանք սեփական պատկերացումներն ունեն և իրենց կոնսպիրոլոգիական տեսությունները, որ աշխարհում ինչ կատարվում է՝ ամբողջն իրենց դեմ է կատարվում՝ ԱՄՆ կողմից կազմակերպված»,- ասաց Արման Դանիելյանը՝ հավելելով, որ ռուսների հետ ո՛չ օրենքի լեզվով է լինում խոսել, ո՛չ բանականության, ո՛չ տրամաբանության, ո՛չ էլ իրենց շահերի:
Ավելին՝ տեսանյութում:
