Շրջանառության հարկը փետրվարի 1-ից ուժի մեջ է մտնում: Տոնավաճառների առևտրականների համար սա իսկական գլխացավանք է, քանի որ բոլոր ապրանքատեսակները պետք է գույքագրեն և ներկայացնեն հարկային մարմիններին:
Դեռ տարեվերջից տոնավաճառներում գրեթե առևտուր չկար, նույն վիճակն է ֆիքսել «Առաջին լրատվական»-ի տեսախցիկը նաև այսօր: Նման պայմաններում առևտրականները պարզապես կասեցնում են իրենց գործունեությունը: Միայն «Ֆիրդուսի» շուկայում վերջին մեկ շաբաթվա ընթացքում 130 տաղավար է փակվել: Մեր շրջայցի ընթացքում բազմաթիվ առևտրականներ հայտնեցին, որ մոտ օրերս պատրաստվում են փակվել, որոշներն արդեն ընթացքի մեջ էին՝ դատարկում էին տաղավարները:
Հաշվապահ պահելը նրանց համար թանկ հաճույք է. մոտ 200 հազար դրամ ամսական աշխատավարձ են պահանջում հաշվապահները, որպեսզի իրենց աշխատանքը թողնեն, գան տոնավաճառ և ամբողջ օրը հաշվառում իրականացնեն: Մեր հարցին՝ հնարավոր չէ՞ մեկ հաշվապահը մի քանի առևտրականների հաշվապահություն իրականացնի, վերջիններս պատասխանեցին, որ դա ֆիզիկապես անհնար է:
Թեև կառավարությունից առանձապես սպասելիքներ չունեն, սակայն հեշտորեն հանձնվել չեն պատրաստվում: Երկուշաբթի նորից վերսկսելու ենք բողոքի ակցիաները:
Մանրամասները տեսանյութում:
