Գեղարքունիքի մարզի ընդհանուր իրավասության դատարանում Յուրիկ Իսկոյանի նախագահությամբ ավարտվել է Գարիկ Փաշայանի գործի դատական քննությունը:
Նախաքննական մարմինը 26-ամյա Գարիկին մեղադրանք էր առաջադրել տուժողի առողջությանը ծանր վնաս հասցնելու համար՝ ՀՀ քրեական օրենսգրքի 112 հոդվածի 1-ին մասով:
Գարիկ Փաշայանը 2014 թվականի հունիսից որպես հովիվ աշխատել է Գեղարքունիքի մարզի «Բոռբոռ» սարատեղում: Նա պահել է ազգությամբ եզդի Իշխանի ոչխարները:
Հուլիսի 1-ին, ժամը 20-ի սահմաններում Գարիկը սարատեղում մի խումբ մարդկանց հետ իր գործատուի՝ Իշխանի վրանում ճաշել և ալկոհոլային խմիչք է օգտագործել:
Հացկերույթին մասնակցող, ալկոհոլ օգտագործած Սուրիկ Ջ.-ն վիճաբանել է Գարիկի հետ, կռվել է: Կռվի ժամանակ Գարիկ Փաշայանը ոչխար խուզելու մկրատով հարվածել է Սուրիկին ու ծանր վնասվածք է պատճառել:
Ընդհանուր իրավասության դատարանում Գարիկ Փաշայանը մեղսագրված արարքում իրեն մեղավոր չի ճանաչել:
Նա հայտնել է, թե Իշխանի ոչխարները պահել է ու բնակվել սարատեղում խփված վրանում:
Դեպքի օրվա երեկոյան ոչխարները սարից բերել է վրանների մոտ ու գնացել է Իշխանի վրան՝ հաց ուտելու:
Իշխանի վրանում այլ մարդիկ էլ են եղել, այդ թվում և Սուրիկ Ջ.-ն:
Վերջինս իրեն հարցրել է. «Ուրդուց ես» Ինքն էլ պատասխանել է. «Ես էլ չգիտեմ՝ որտեղից եմ»:
Իր պատասխանը վիրավորական է թվացել Սուրիկին, նա կարծել է, թե ինքը ծաղրանքով է պատասխանել:
Բայց ինքն այդպես է պատասխանել, որովհետև իրականում տուն չունի, ծնողներ չունի, ապրում է անասուններ պահելու վայրում:
Երբ վրանից դուրս են եկել, Սուրիկը մոտեցել է իրեն, ասել է. «Որ հարցնում եմ՝ որտեղի՞ց ես, ինչո՞ւ նորմալ չես պատասխանում»:
Այս ասելով՝ Սուրիկը թևանցուկ է արել իրեն ու գլխով հարվածել է իր դեմքին, իրենք քաշքշել են մեկմեկու:
Միջադեպին ներկաները բաժանել են իրենց, իրեն ասել են. «Գնա քո վրանը, մենք Սուրիկին կտանենք: Որ Սուրիկը օղի է խմում, վատանում է, ակտիվանում»:
Ինքը գնացել է իր վրանը: Այնտեղ ոչ ոք չի եղել: Քանի որ Սուրիկ Ջ.-ն իրենից ֆիզիկապես ուժեղ էր, ինքը վախեցել է նրանից: Նստել է իր վրանում, մահճակալի վրա:
Այդ ժամանակ Սուրիկ Ջ.-ն, մյուսների ձեռքից պոկվելով, վազելով ներս է մտել վրան, բռնել է իր պարանոցից, սկսել է քաշքշել: Երբ բռնել է իր պարանոցից, ինքը նստած է եղել մահճակալին: Սուրիկը իր պարանոցից բռնել, սեղմել է, իրեն գցել է մահճակալին, պառկել է իր վրա:
Ինքը հրել է նրան ու վրանից դուրս է եկել: Այն ժամանակ, երբ Սուրիկը սեղմել է իր պարանոցը, իրեն քաշքշել է, իր աչքերը «թացացել են», տեսողությունը վատացել է:
Ինչ-որ բան է ընկել ձեռքի տակ: Չի հասկացել, թե որ պահին է այդ «բանով» վնասել Սուրիկին: Նա ոտքի է կանգնել, ասել է՝ վախ, կողքս:
Երբ Սուրիկին տեղափոխել են հիվանդանոց, Իշխանի կինն իրեն տարել է իրենց վրան, որ Սուրիկի հարազատները չվնասեն: Նրանց սեղանին օղի է եղել, ինքը վախից մի քանի բաժակ օղի է խմել:
Ամբաստանյալն ասել է, թե մինչև օրս չի հավատում, որ ինքը վնասել է Սուրիկ Ջ.-ին:
Տուժողը համարյա նույն բանն է ասել, նշել է, թե ինքը կարծել է՝ հովիվը իրեն ծաղրում է, չի ցանկանում իր հարցին պատասխանել: Դրա համար է զայրացել նրա վրա ու հարձակվել:
Տուժողն ասել է, թե Գարիկի վրանում լուսավորությունը նորմալ է եղել, ինքը նրա ձեռքին մկրատ չի տեսել: Նա իրեն չի սպառնացել: Ինքը չի էլ զգացել, թե երբ է վնասվածք ստացել: Ոտքի է կանգնել, աչքերի առաջը սևացել է, այդ ժամանակ է նկատել, որ կողքից արյուն է գալիս: Իրեն անմիջապես տեղափոխել են Մարտունու բժշկական կենտրոն:
Տուժողն այն կարծիքն է հայտնել, թե չի հավատում, որ իրեն վնասվածք է պատճառել Գարիկը: Իր կարծիքով՝ ինքն ընկել է վրանում եղած «անկյունակի» վրա, դրանից է վնասվածք ստացել:
Տուժողը Գարիկից պահանջ կամ բողոք չի ունեցել:
Ականատես վկաները նույնատիպ ցուցմունքներ են տվել:
Ընդհանուր իրավասության դատարանը եզրակացրել է, որ նախաքննական մարմինը սխալ է որակել կատարված արարքը:
Գարիկ Փաշայանի արարքը դիտավորությամբ տուժողի առողջությանը ծանր վնաս հասցնել չէ:
Դեպքի պահին Գարիկ Փաշայանը հայտնվել է անհրաժեշտ պաշտպանության վիճակում: Նրա վրա հարձակվել է ֆիզիկապես ավելի ուժեղ տուժողը, վեճ ու կռվի նախաձեռնողը եղել է վերջինս: Նա Գարիկի նկատմամբ բռնություն է գործադրել ինչպես դրսում, այնպես էլ վրանում, սեղմել է նրա պարանոցը, գցել է մահճակալին: Գարիկը մտածել է՝ նա իրեն խեղդում է:
Գարիկ Փաշայանը պաշտպանվել է, հարվածել է տուժողի կողմից հակաօրինական արարք կատարելու պահին, բայց իր նկատմամբ ինտենսիվ, իրական, վտանգավոր ոտնձգություն կատարողին մկրատով հարվածելով՝ արարքը կատարել է անհրաժեշտ պաշտպանության սահմանազանցումով:
Ընդհանուր իրավասության դատարանը Գարիկ Փաշայանին մեղավոր է ճանաչել անհրաժեշտ պաշտպանության սահմանազանցումով տուժողի առողջությանը ծանր վնաս հասցնելու համար՝ ՀՀ քրեական օրենսգրքի 116 հոդվածի 2-րդ մասով:
Գարիկ Փաշայանը դատապարտվել է 150 հազար դրամ տուգանքի: