Կրծքավանդակի միջնորմում տեղակայված հանգուցավոր գոյացությունների ախտորոշման համար, երբ բոլոր տեխնիկական միջոցները սպառում են իրենց և հնարավոր չէ հստակ պատկեր ստանալ, կատարվում է ախտորոշիչ թորակոստոպիա կամ թորակոտոմիա:
Թորակս՝ նշանակում է կրծքավանդակ: Մինի թորակոտոմիա՝ կրծքավանդակի հատում:
Ախտորոշիչ թորակոստոպիա կամ թորակոտոմիա կատարելիս կրծքավանդակի հատվածում արվում է փոքր չափի կտրվածք, կամ օպտիկական սարքերի միջոցով մտնում են կրծքավանդակի խոռոչ, ստուգում, թե ինչպիսի պրոցեսներ են առկա: Այդ փոփոխված հանգույցից հեռացնում կամ կտոր են վերցնում բիոպսիայի համար: Այնուհետև գնահատվում են արդյունքները և որոշվում հետագա քայլերը:
Համակարգչային հետազոտությունների տվյալներով՝ եթե առկա են թոքարմատի շրջանի լիմֆատիկ գեղձի ախտահարված, մեծացած հանգույցներ, նաև հանգույցներ թոքի հյուսվածքի մեջ, բրոնխների շուրջ կամ միջնորմի շրջանում մեծացած ավշային հանգույցներ, ապա կատարվում է համակարգչային շերտագրում, որը տրամադրում է ախտահարված օրգանների ընդհանուր պատկերը: Սակայն պարզելու համար, թե ախտահարումն ինչպիսի բնույթ ունի՝ բորբոքային, ուռուցքային, թե այլ սպեցիֆիկ բնույթ, բժշկությունը ճարահատյալ դիմում է բաց բիոպսիայի՝ հետագայում ճիշտ մարտավարություն մշակելու համար:
Եթե ուռուցքային պրոցես է, ապա նշանակվում է քիմիաթերապիա, եթե բորբոքային պրոցես է, ապա՝ հակաբորբոքային բուժում, եթե սպեցիֆիկ պրոցես է՝ սպեցիֆիկ բուժում: Վիրահատությունը կատարվում է ախտորոշման նպատակով:
«Առաջին լրատվական»-ի եթերում վիրահատությունը կատարում է Էրեբունի ԲԿ-ի կրծքային վիրաբուժության կլինիկայի վարիչ, բժշկական գիտությունների դոկտոր, պրոֆեսոր՝ Արտակ Կառլենի Հովհաննիսյանը: