Քաջարանում հեպատիտ C-ով վարակված քաղաքացիներից և բուժանձնակազմից արյուն է վերցվել, և այժմ Երևանում փորձաքննություն է անցկացվում՝ պարզելու վարակի ծագման աղբյուրը: Հանրապետության գլխավոր վարակաբան Արա Ասոյանը լրագրողների հետ զրույցում նշեց, որ վիրուսի հայտնաբերումը դեռ չի նշանակում, որ մարդիկ հեպատիտ C-ով են հիվանդ: Նա նշեց, որ հիվանդության բուժման համար ֆինանսական աջակցություն արդեն կա:
Այս պահին Քաջարանի հիվանդանոցի վիրահատարանը փակ է, առողջապահության փոխնախարար Վահան Պողոսյանը տեղեկացրեց, որ հնարավորինս կարճ ժամկետներում վիրահատարանը պետք է վերագործարկվի և ծառայություններ մատուցի քաղաքացիներին:
«Ստեղծվել է համապատասխան հանձնաժողով, վարչական վարույթ է հարուցվել, որպեսզի պարզենք ինֆեկցիայի առաջացումը: Մենք բազմաթիվ ուղղություններով ուսումնասիրություններ ենք իրականացնում»,- հայտնեց Պողոսյանը:
Ինչ վերաբերում է ամենօրյա ստուգումներին, Հիգիենիկ համաճարակային տեսչության պետ Արտավազդ Վանյանը տեղեկացրեց, որ հիվանդանոցները լիցենզավորված կազմակերպություններ են, ունեն բոլոր փաստաթղթերը, նորմատիվները, որպեսզի բարձրորակ սպասարկում իրականացնեն, «չենք կարող ամեն օր գնալ, ասել բուժանձնակազմին՝ այս ձևով աշխատեք կամ այն ձևով աշխատեք»:
Մանրամասները՝ տեսանյութում: