«Մեծ աղետ է եղել, և մարդիկ շատ ընկճված են: Նրանք նաև շատ պահանջատեր են և այդ իրավունքն ունեն: Նրանք ուզում են հասկանալ, թե իրենք իրենց տներում կարո՞ղ են հանգիստ ապրել: Եվ ես՝ որպես պատգամավոր, գյումրեցիների հետ ռուսական կողմից շատ հստակ մեսիջներ եմ ակնկալում. իրենք մտահոգված են, որ գործը կբացահայտվի, և բոլոր մեղավորները պատասխան կտան»,- «Առաջին լրատվական»-ի հետ զրույցում ասաց Հանրապետական խմբակցության պատգամավոր Արման Սահակյանը, ով մեծամասնական ընտրակարգով ընտրվել է հենց Գյումրիից:
Ա. Սահակյանն այսօր Ազգային ժողովում մասնակցում էր Գյումրիում ռուսական ռազմաբազայի զինծառայող Վալերի Պերմյակովի կողմից կատարված ոճրագործության պատճառով Պետաիրավական հարցերով մշտական հանձնաժողովի հրավիրած լսումներին: Լսումների ժամանակ պատգամավորների հարցերին պատասխանում էր Գլխավոր դատախազ Գևորգ Կոստանյանը:
Հարցին՝ արդյոք գլխավոր դատախազի պատասխանները բավարարե՞լ են իրեն, Ա. Սահակյանը պատասխանեց. «Ինձ մոտ հարցեր կան, թե նա սահմանապահների կողմից ինչպես է ձերբակալվել ու հանձնվել ռուսական կողմին: Գլխավոր դատախազը խոստացավ շուտափույթ տեղեկություն տալ»:
Իսկ պատգամավորը չի՞ կարծում, որ ռուսական կողմը Պերմյակովին ռազմաբազայում պահելով՝ ցանկանում է կոծկել այդ հանցագործության ինչ-որ կարևոր հատվածը: «Հակված չեմ այդպես կարծելու, շատ հարցեր կան, որոնց պատասխանները, հուսով եմ, կստանանք: Այս պահին իմ հարցերը գլխավորապես վերաբերում են այն խնդրին, թե ինչպես նրան ձերբակալեցին ու հանձնեցին ռուսական կողմին: Արդյոք մեր մարմինների՞ն պետք է հանձնեին, թե՞ ոչ: Այս պահին ինձ ամենաշատը դա է հետաքրքրում, որովհետև կասկածներ կան, թե այնքան էլ իրավաչափ չէ, որ այսօր նա ռազմաբազայում է գտնվում»,- պատասխանեց նա:
Մեր դիտարկմանը՝ այդ ոճրագործությունը ու հատկապես այն ռուսական օրենսդրության ու իրավապահների կողմից քննելու հանգամանքը Գյումրիում չե՞ն խորացրել հակառուսական տրամադրությունները, պատգամավորը արձագանքեց. «Սպանողը ռուս զինվոր է եղել, հիմա եթե վրացի զինվոր լիներ, կասեիք, թե հակավրացական տրամադրություններ են»: