Հայաստան-Եվրամիություն համագործակցության խորհրդի նիստից հետո «Ազատություն» ռադիոկայանի հետ զրույցում Եվրամիության Հարևանության և ընդարձակման հարցերով հանձնակատար Յոհանես Հանը չի բացառել, որ հնարավոր է՝ առաջիկայում Երևանի հետ ստորագրվի Ասոցացման համաձայնագիրը՝ առանց ազատ առևտրի բաղադրիչի: Ռադիոկայանի փոխանցմամբ՝ Հանն ընդգծել է, որ կողմերն այժմ հենց այդ հարցի շուրջ են բանակցում:
Եվրոպական քաղաքականության վերլուծությունների կենտրոնի (CEPS) ավագ վերլուծաբան և Բելգիայի Գենտ համալսարանի քաղաքագետ-գիտաշխատող Հրանտ Կոստանյանը «Առաջին լրատվական»-ի հետ զրույցում ասաց, որ չի կարծում, թե հնարավոր է, որ Հայաստանը ստորագրի Ասոցացման համաձայնագրի քաղաքական մասը:
«Այդպիսի որոշում չի կայացվել, ըստ որի՝ Հայաստանը կարող է ստորագրել Ասոցացման համաձայնագրի քաղաքական մասը: Երևի թե հանձնակատարի խոսքերը ճիշտ չեն մեկնաբանվել, որքան ես պատկերացնում եմ, այդպիսի որոշում չի եղել, չեմ էլ կարծում, որ նմանատիպ տարբերակը հնարավոր է: Համենայնդեպս, ես չեմ տեսել այդպիսի հստակ հայտարարություն, ըստ որի՝ Եվրոպական միությունը համաձայնի, որ Հայաստանը ստորագրի Ասոցացման համաձայնագրի քաղաքական մասը»:
Մեր այն հարցին, թե ինչո՞ւ է կարծում, որ այդ տարբերակն անհնար է՝ արդյոք ա՞յն պատճառով, որ Հայաստանն անդամագրվել է Եվրասիական տնտեսական միությանը, Հրանտ Կոստանյանը պատասխանեց․ «Այստեղ խոսքը այնքան էլ եվրասիական տնտեսական միության մասին չէ: Խոսքը նոր համաձայնագրի մասին է: Քանի որ նախկին համաձայնագիրը մերժվել է ՀՀ իշխանությունների կողմից, դա պետք է փոխարինվի նոր համաձայնագրով: Դրա մեջ հստակ նշվում է, թե այդ համաձայնագիրը ինչ ոլորտներ պետք ծածկի: Երկրորդը՝ այդ հստակեցումից հետո Եվրոպական միության 28 անդամ երկրները պետք է մանդատ տան Եվրոպական հանձնաժողովին և արտաքին հարաբերությունների ծառայությանը, որոնք դրանից հետո կսկսեն բանակցությունը ՀՀ իշխանությունների հետ: Խոսքը նոր համաձայնագրի և նոր ընթացակարգի մասին է»,- ընդգծեց մեր զրուցակիցը:
Նա հավելեց, որ այլ հարց է այն, որ նախկին համաձայնագրի արդեն համաձայնեցված որոշակի մասեր, անշուշտ, կներառվեն այս նոր համաձայնագրում․ «Եթե գործըթնացը սկսվի, կարծում եմ՝ շատ արագ կընթանա: Կլինեն, անշուշտ, մասեր, որոնք հնարավոր չի լինի այլևս ներառել համաձայնագրում, քանզի Հայաստանը պարտավորություններ է ստանձնել Եվրասիական տնտեսական միության հանդեպ»: