Քիչ առաջ ավարտվեց իշխող Հանրապետական կուսակցության գործադիր մարմնի նիստը: Նիստից հետո ՀՀԿ խոսնակ, ԱԺ փոխնախագահ Էդուարդ Շարմազանովն ասաց, որ քննարկել են սահմանային լարվածությունը, ներքաղաքական և ներկուսակցական հարցեր:
«Այո սահմանին որոշակի անհանգստություն կա, ու Ադրբեջանը, ինչպես նախորդ տարվա հունվարին, այս տարին ևս սկսել է հրադադարի ռեժիմը խախտելով, բայց ես չեմ կարծում, որ խնդիրը մոտ է պատերազմի վերսկսման»,- ասաց Շարմազանովը՝ ի պատասխան լրագրողի այն հարցին, թե հնարավո՞ր է՝ սկսվի լայնամասշտաբ պատերազմ:
Նրա կարծիքով՝ ինչպես նախորդ տարվա ընթացքում, այս տարի ևս Ադրբեջանը կփորձի լարված պահել սահմանը. «ՀՀ Զինված ուժերը, Արցախի Պաշտպանության բանակը, ինչպես նախորդ տարիների ընթացքում, այս տարի ևս կարող է պահպանել Հայաստանի և Արցախի անվտանգությունը: Մեծ դժբախտություն է, երբ մենք կորուստ ենք ունենում, բայց մենք պետք է գիտակցենք, որ տեսականորեն չի կարող լինել վերջնական խաղաղություն, երբ մշտական խաղաղության պայմանագիր չի կնքվել:
Գործը հասել է նրան, որ մեր հարևանը նույնիսկ եվրոպական ամենամեծ երկրի կանցլերի հետ ասուլիսին է պաշտոնապես կեղծում: Եթե նայում ենք ադրբեջանական տեղեկատվությունը, ապա՝ գերմանական պաշտոնական կայքերում թե՛ տեսանյութը, թե՛ սղագրությունը, Ադրբեջանը շարունակում է կեղծիքի վրա հիմնված իր քաղաքականությունը»:
Ամբողջությամբ՝ մեր տեսանյութում: