Ձևավորվել է հակասահմանադրական դավադրություն մեր ժողովրդի դեմ

«Առաջին լրատվական»-ի զրուցակիցն է քաղաքագետ Անդրիաս Ղուկասյանը

– Պարոն Ղուկասյան, Գյումրիում տեղի ունեցած ողբերգական իրադարձություններից հետո հայ հասարակությունը պահանջում է Պերմյակովին հայ իրավապահներին հանձնել: ՌԴ-ն այս առումով մինչև այսօր որևէ քայլ չի արել: Ավելին՝ չգիտենք՝ գլխավոր դատախազը, որ խոստացել էր նամակով դիմել ՌԴ գլխավոր դատախազին, դիմե՞լ է, թե՞ ոչ: Երեկ էլ Պուտինի խոսնակն է մեկնաբանել, թե քանի որ Պերմյակովը ՌԴ քաղաքացի է, ուրեմն ռուսաստանյան դատարանում գործը պետք է քննվի: Դատելով այս հայտարարություններից՝ կարելի՞ է ենթադրել, որ ՌԴ-ն այդպես էլ կասկածյալին հայ իրավապահներին հանձնելու պատրաստակամություն չի ցուցաբերի:

– Ինչպես նշեցիք, առ այսօր չկա որևէ ապացույց, որ ՀՀ-ն դիմել է 102-րդ բազայի ռազմական ղեկավարությանը, որ Պերմյակովին հանձնեն ՀՀ քննչական մարմնին: Ապացույց, որ դիմել են և ստացել են մերժում, չկա: Ճիշտ նշեցիք, որ Գևորգ Կոստանյանը խոստացավ, որ կլինի, և տեսնում ենք, որ այս որոշումն արդեն ընդունված է, իսկ Գևորգ Կոստանյանը քաղաքացիներին տված իր խոստումը, ըստ էության, չի կատարել: Այսինքն՝ կա մի երևույթ. մեր ազգային անվտանգությանը հասցվել է հարված, քաղաքացիներն առաջ են քաշել շատ ճիշտ պահանջ, որպեսզի այդ գործի հետաքննությունը կատարվի Հայաստանում: Սա ազգային անվտանգության տեսակետից մեծ նշանակություն ունեցող հանգամանք է, և պետք է մեղավորները պատիժ կրեն Հայաստանում: Սա էլ էական նշանակություն ունեցող հանգամանք է տվյալ գործում:

Տեսնում ենք, որ ձևավորվել է հակասահմանադրական դավադրություն մեր ժողովրդի դեմ: Ըստ գործող օրսենդրական և միջազգային պայմանագրային դաշտի՝ ՌԴ սահմանապահ զորքերը, որոնք ենթարկվում են ՌԴ անվտանգության դաշնային ծառայությանը, գործում են Հայաստանում՝ իրենց բոլոր գործառույթները համաձայնեցնելով ՀՀ նախագահի և կառավարության հետ: Սա որոշված է պայմանագրով:Նրանք պարտավոր են ղեկավարվել ՀՀ սահմանադրությամբ և թույլ չտալ իրենց ներխուժել ՀՀ ներքին գործեր և պարտավոր են հետաքննչական գործողությունները կատարել ՀՀ քրեական օրենսգրքի համաձայն: Այսինքն՝ որևէ մի անձ, երբ փորձում է հատել հայ-թուրքական սահմանը և ձերբակալվում է սահմանապահների կողմից, ըստ գործող ընթացակարգերի՝ պետք է հանձնվի Հայաստանի քննչական մարմիններին:

Բացի դրանից՝ և՛ երկրի նախագահը, և՛ կառավարությունը, և՛ ազգային անվտանգությունն այն մարմիններն են, որոնք անմիջականորեն համագործակցում են ռուս սահմանապահների հետ: Մենք տեսանք, որ ո՛չ Սերժ Սարգսյանը, ո՛չ Հովիկ Աբրահամյանը, ո՛չ Գորիկ Հակոբյանը որևէ գործողություն չեն արել, որ Վալերի Պերմյակովը, որը գլխավոր կասկածյալն է այս հանցագործության մեջ, հանձնվի ՀՀ քննչական մարմիններին: Որևէ գործողություն նրանք չեն արել և առ այսօր չեն կանգնել ժողովրդի օրինական պահանջիկատարման համար:

Բացի այդ ամենից՝ ռուսական 102-րդ ռազմակայանը մտնում է Ռուսաստանի և Հայաստանի ընդհանուր զորքերի խմբավորման մեջ: Այդ խմբավորումը գտնվում է Հայաստանի իրավասության տակ: Խմբավորման հրամանատարը գեներալ-լեյտենանտ Միքայել Գրիգորյանն է, որը ենթարկվում է ՀՀ պաշտպանության նախարար Սեյրան Օհանյանին: Ո՛չ Սեյրան Օհանյանը, ո՛չ Միքայել Գրիգորյանը, որոնք ռուս-հայկական համատեղ խմբավորման հրամանատարներն են, որևէ գործողություն չեն կատարել, որպեսզի ռուսական 102-րդ ռազմակայանի զինվորականը փոխանցվի Հայաստանի քննչական մարմիններին:

Երրորդ՝ այս ոլորտը կարգավորող օրենսդրությունը հետևյալն է. ՌԴ քրեական օրենսգրքի 13-րդ հոդվածի համաձայն՝ ՌԴ զինվորականները, եթե կատարում են ՌԴ տարածքից դուրս հանցագործություններ, ենթակա են պատժի ՌԴ քրեական օրենսգրքով այն դեպքերում, երբ չկա միջպետական պայմանագիր: Հայաստանի և Ռուսաստանի միջև կա միջպետական պայմանագիր, որի համաձայն նման հանցագործությունների համար այդ զինվորականները ենթարկվում են քրեական պատասխանատվության օրենսդրությամբ և պատիժը կրում են Հայաստանում: Եվ մենք տեսանք, որ պատկան մարմինները՝ ոստիկանություն, դատախազություն, քննչական կոմիտե, որևէ գործողություն չեն կատարել, որ մեղադրյալին հանձնեն հայ իրավապահ մարմիններին. ո՛չ Վլադիմիր Գասպարյանը, ո՛չ Աղվան Հովսեփյանը, ոչ էլ Գևորգ Կոստանյանը: Ավելին՝ մենք տեսանք, որ Գևորգ Կոստանյանը ըստ էության խաբեց քաղաքացիներին՝ կրքերը հանդարտեցնելու համար, խոստացավ, որ միջնորդություն կներկայացվի, բայց չներկայացրեց:

Ամփոփելով այս ամենը՝ ես տեսնում եմ, որ ՀՀ բարձրագույն պաշտոններ զբաղեցնող անձինք միավորվել են, հակասահմանադրական դավադրություն են կազմակերպել և գործում են մեր ժողովրդի դեմ:

Ավելին՝ տեսանյութում: