Այսօր կրկին նախագահական նստավայրի դիմաց էին հավաքվել «Նաիրիտ» գործարանի արդեն նախկին աշխատակիցները նույն պահանջով՝ վերջնահաշվարկ իրականացնել և վճարել իրենց աշխատավարձերը: Թեև իրենք ևս թերահավատ են, որ նման ակցիաների միջոցով հնարավոր կլինի ստանալ իրենց հասանելիքը:
«Մեր կառավարությունից ոչինչ չենք սպասում, դրանցից հույս չկա: Ուրիշ տեղերում գործարաններ են բացում, իսկ մեզ մոտ փակում են ու հազարավոր մարդկանց գործազուրկ են դարձնում: Բա մեզ ո՞վ է կերակրելու: Գոնե վերջնահաշվարկը տան, որ կարողանանք մի քանի ամիս էլ դրանով ապրել: Իսկ դրանից հետո էլ կտեսնենք՝ ինչ անենք»,- «Առաջին լրատվական»-ի հետ զրույցում ասաց աշխատակիցներից մեկը:
Աշխատակիցները չեն հավատում նաև, որ երբևէ գործարանը կվերագործարկվի, ինչպես հավաստիացնում են կառավարության մի քանի ներկայացուցիչներ: «Դրանք սաղ սուտ են, բլեֆ: Ոչ մի բան էլ չեն անի: Հակառակը, նրանք շահագրգռված են գործարանը լրիվ քանդելու: Չհավատաք, որ երբևէ «Նաիրիտը» կաշխատի»,- ասաց մեկ այլ աշխատակից:
«Նաիրիտի» աշխատակիցները պատրաստվում էին այսօր նախագահականի մոտ մնալ մինչև կեսօր: Գործարանի արհմիության ղեկավար Հրաչ Թադևոսյանի խոսքով՝ դրանից հետո գույքի օտարման հանձնաժողով է ստեղծվելու, որ գործարանից որոշակի քանակությամբ գույք շատ շտապ օտարվի, գույքը վաճառվի և աշխատակիցների աշխատավարձերի պարտքի մի մասը մարվի: