Սաուդյան Արաբիայի նավթի հարցերով նախարար Ալի Ալ-Նաիմին հայտարարել է, որ թագավորությունը կպահպանի օրական 9.7 միլիոն բարել նավթի արդյունահանումը, եթե «միայն նոր հաճախորդ չավելանա, այդ ժամանակ մենք կավելացնենք ծավալները»: Նախարարին մեջբերում է The Financial Times պարբերականը:
«Եթե մենք կրճատենք արդյունահանումը, ի՞նչ կպատահի շուկայում մեր բաժնի հետ: Այն այլ արտադրողի կանցնի, և նավթի գինը կաճի: Այդ արտադրողը կարող է ռուս, բրազիլացի կամ ամերիկացի լինել, կամ ցանկացած ուրիշը, ով մեծ ավելցուկ ունի»,- ասել է Ալ-Նաիմին:
Նախարարի խոսքերով՝ ԱՄՆ-ից նավթի մատակարարման աճի, ՕՊԵԿ-ի երկրների նավթի արդյունահանման ծավալների պահպանման և գլոբալ պահանջարկի դանդաղեցման ֆոնին քիչ հավանական է, որ նավթը կրկին վերադառնա մեկ բարելի համար 100 դոլար ցուցանիշին: Նա ընդգծել է, որ Սաուդյան Արաբիան նավթի շուկայում կառավարվում է բացառապես տնտեսական, այլ ոչ թե քաղաքական դրդապատճառներով, այդ պատճառով էլ թակարդների ցանկացած թեորեա հիմնավորված չի հնչում:
Ալ-Նաիմին նշել է, որ Պարսից ծոցի երկրները, որոնք արդյունահանման ցածր մակարդակ ունեն, կդիմակայեն նավթի գնին: Նա ավելացրել է, որ գները պետք է ավելանան, քանի որ կնվազի թանկարժեք նավթի արդյունահանումը:
2014թ. հունիսից սկսած՝ նավթի գինը գրեթե կրկնակի նվազել է՝ մեկ բարելի համար 115 դոլարից հասնելով մինչև 60 դոլարի: Նոյեմբերի վերջին ՕՊԵԿ-ի գագաթնաժողովին, որտեղ առաջնորդի դիրքերը Սաուդյան Արաբիան է զբաղեցնում, որոշում է կայացվել պահպանել օրական 30 միլիոն բարել ցուցանիշը:
Դեկտեմբերի 20-ին, հանդես գալով Աբու-Դաբիի էներգետիկ ֆորումին, Ալ-Նաիմին ստեղծված իրավիճակի համար մեղադրել է կարտելում չներգրավված երկրներին: «Սաուդյան Արաբիան և այլ երկրները ձգտում են շուկային հավասարակշռություն վերադարձնել, սակայն ՕՊԵԿ-ից դուրս երկրների կողմից համագործակցության անբավարար ձգտումը, ոչ ճշմարիտ տեղեկատվության տարածումը և խարդախությունները շարունակում են նավթի գների անկման պատճառ դառնալ»,- ասել է նախարարը:
