«Առաջին լրատվական»-ի զրուցակիցն է ՀՀ ԱԺ անկախ պատգամավոր Էդմոն Մարուքյանը։
-Պարոն Մարուքյան, որպես անկախ պատգամավոր՝ այս տարիներին Դուք Ձեզ չտեսաք ո՛չ իշխանության, ո՛չ ընդդիմության բևեռներում: Այդ դեպքում որտե՞ղ եք Ձեզ տեսնում, և ի՞նչ պետք է անել:
-Կարծում եմ՝ դեռ ժամանակ կա կողմնորոշվելու, թե որտեղ, ինչ ձևաչափով պետք է շարունակեմ իմ քաղաքական գործունեությունը: Այդ առումով չեմ շտապում, այսինքն՝ հանգիստ եմ և հասկանում եմ, թե ինչ եմ անում, ուր եմ գնում,ու կարծում եմ՝ նաև չի եղել մի իրավիճակ, որ ես ինչ-որ տեղ լինեի, որովհետև ես ունեցել եմ իմ յուրահատուկ գիծը, քաղաքական նշանակությունը և ամեն հարցի հետ կապված իմ ցանկացած որոշում եղել է պատճառաբանված, հիմնավորված և բոլորի համար հասկանալի, այսինքն՝ եթե ես ինչ-որ հարցում միանում եմ ինչ-որ ուժի, դրա պատճառները բոլորի համար ակնհայտ են:
Մեր իրականության մեջ մարդկանց անընդհատ փորձ է արվում տեղավորել արկղերի մեջ, թե դուք այստեղ պետք է լինենք, նրանք՝ այնտեղ, և ավելի շատ լրատվական դաշտում է նման պահանջ դրվում: Հարցնում են՝ ընդդիմությանը դուք ինչու չեք միանում, բայց ո՞ւմ միանամ և ինչի՞ համար: Սրանք արհեստական հարցեր են:
Կոնկրետ ես իմ պատգամավորական գործունեությունը բաժանել եմ երկու մասի: Առաջին՝ որպես մեծամասնական ընտրակարգով ընտրված պատգամավոր ինչ եմ ես անում, ինչպես եմ ներկայացնում այն ընտրատարածքը, որն ինձ գործուղել է խորհրդարան, և երկրորդ՝ իմ նախասիրություններից, իմ քաղաքական նպատակներից ելնելով՝ նաև միջազգային հարաբերությունների առումով իմ գործունեությունը: Այս երկու ուղղություններն էլ հավասարապես իրենց առաջնահերթությունների առումով փորձելու եմ առաջ մղել:
-Պարոն Մարուքյան, համամասնական ընտրակարգի անցնելու դեպքում ազատ պատգամավորներ ԱԺ-ում չենք ունենա: Ի՞նչ վտանգներ եք տեսնում:
-Միշտ էլ բոլոր գումարման խորհրդարաններում եղել են անկախ պատգամավորներ, որոնց մեջ եղել են հաջողակ, ակտիվ գործող անկախ պատգամավորներ: Ես չեմ կարծում, որ քաղաքական ուժերը բանակցությունների արդյունքում գալու են այն եզրահանգման, որ համամասնական հարյուր տոկոսանոց համակարգ է լինելու: Լինելու է փուլային լուծում, կկրճատվեն ինչ-որ տարածքներ կամ կփորձեն այլ տարբերակ, այլ մեխանիզմ ներդնել: Դա կարող է լինել ռեյտինգային քվեարկություն, մարզային քվեարկություն: Ամեն դեպքում, տեխնիկական անցում 100 տոկոս համամասնականի չի լինի: Ես շատ եմ խոսել համամասնական ընտարակարգի հետ կապված, որ դա իրականում սխալ է, որովհետև այսօր այն խնդիրները, որոնք նշվում են մեծամասնականի հետ կապված, դրանից ավելի բարդ խնդիրներ կան համամասնական ընտրակարգում:
-Այսինքն՝ այդ դեպքո՞ւմ էլ դարձյալ չենք ազատվի օլիգարխ պատգամավորներից:
-Օլիգարխները ընտրական համակարգի արդյունք չեն, այլ քաղաքական համակարգի արդյունք են, որովհետև օլիգարխները խորհրդարան են գալիս թե՛ մեծամասնական, թե՛ համամասնական ընտրակարգով: Երբ քո քաղաքական համակարգը օլիգարխիական քաղաքական համակարգ է, հիմնված է ամբողջությամբ ֆինանսական կարողություններով քաղաքականություն վարելու վրա, դու միշտ ունենալու ես օլիգարխներ: Հիմա ինչ տարբերություն՝ օլիգարխները գալու են ցուցակներո՞վ, թե՞ տարածքներից:
Ավելին ասեմ, երևի լավ է, որ գան տարածքներից, գոնե այդ տարածքների համար ինչ-որ բան կանեն: Ցուցակներով եկած օլիգարխները որևէ բան չեն անելու այդ տարածքների համար: Քննարկումն այլ տեղ պետք է տանել։ Պետք է ունենանք ժողովրդավարական ներքին կառուցվածք ունեցող կուսակցություններ, որտեղ որոշումները կկայացվեն բոլորի մասնակցությամբ: Քաղաքական համակարգի առողջացման համար սա կարևոր հանգամանք է:
Ավելին՝ տեսանյութում: