Պակիստանում առաջիկա մի քանի շաբաթվա ընթացքում մահապատժի կենթարկեն մոտ 500 ահաբեկիչների, որոնք ավելի վաղ դատապարտվել են բարձրագույն պատժի: TASS-ի հաղորդմամբ՝ այս մասին հայտարարել է երկրի ՆԳՆ ղեկավար Չոուդրի Նիսար Ալի Խանը:
«ՆԳՆ-ն արտոնել է այդ բանտարկյալների մահապատիժը: Նրանց ներման խնդրանքները նախագահը մերժել է»,- ասել է նա:
Միաժամանակ Պակիստանի ՆԳՆ ղեկավարն ահաբեկիչների կողմից հնարավոր պատասխան միջոցների մասին ասել է. «Մենք չպետք է կորցնենք զգոնությունը, եթե ուզում ենք վրեժ լուծել Փեշավարի ահաբեկչության զոհերի համար: Մենք պատերազմական վիճակում ենք, մենք կհաղթենք այդ պատերազմում»,- նշել է Չոուդրի Նիսար Ալի Խանը:
Դեկտեմբերի 17-ին Պակիստանի վարչապետ Նավազ Շարիֆը հանել է մահապատժի մորատորիումը, որը երկրում գործել է 2008 թվականից: Այդ որոշումն ընդունվել է դեկտեմբերի 16-ին Պակիստանի Փեշավար քաղաքի դպրոցի վրա «Թեհրիք-ի-թալիբան Պակիստան» շարժման գրոհայինների հարձակումից հետո, որի հետևանքով զոհվել է 148 մարդ, որոնցից ավելի քան 130-ը՝ երեխաներ: