Եվրասիական տնտեսական խորհրդի գերագույն նիստում կհայտարարվի Հայաստանի Հանրապետության՝ ԵՏՄ-ին միանալու մասին պայմանագրի վավերացման ընթացակարգերի ավարտի մասին: Հայաստանը միության անդամ կդառնա 2015թ. հունվարի 2-ին: Այս մասին այսօր հայտարարել է ՌԴ նախագահի օգնական Յուրի Ուշակովը:
«Երեք երկրների նախագահները (Ռուսաստան, Ղազախստան, Բելառուս) վաղը (երեքշաբթի) կհայտարարեն ԵՏՄ-ին Հայաստանի միանալու պայմանագրի վավերացման ընթացակարգի ավարտի մասին: Հայաստանը կդառնա միության լիիրավ անդամ արդեն դրա գործարկման հաջորդ օրը, այսինքն՝ 2015թ. հունվարի 2-ին»,- հայտնել է Ուշակովը ճեպազրույցում:
Եվրասիական տնտեսական միության ստեղծման մասին պայմանագիրը ստորագրվել էր մայիսի 29-ին Աստանայում՝ Ռուսաստանի, Ղազախստանի, Բելառուսի կողմից, փաստաթուղթն ուժի մեջ է մտնում 2015թ. հունվարի 1-ից: Հայաստանը պայմանագիրը ստորագրել է 2014թ. հոկտեմբերի 10-ին: ԵՏՄ-ին Հայաստանի միանալու մասին պայմանագիրը վավերացրել են Ռուսաստանի, Բելառուսի և Ղազախստանի խորհրդարանները: