Ճապոնական ֆիթնես-թրեքերներ արտադրող Docomo Healthcare Inc.-ը ներկայացրել է Moveband 2 սպորտային թևնոցների գովազդը, որում 4 սումոյիստ է նկարահանվել: Հոլովակում նրանք հանդես են եկել ռոք-կատարողների կերպարներով, հայտնում է The Wall Street Journal-ը:
Ընկերության մամլո քարտուղար Նաոկո Դեգուչիի խոսքով՝ ընկերությունը որոշել է խաղարկել թևնոցի անունը՝ Moveband 2, և սումոյիստներին ներկայացնել որպես ռոք-խմբի անդամներ: Դեգուչին նաև նշել է, որ սումոյիստները նկարահանումների ժամանակ միայն նմանակել են երաժշտական գործիքներ նվագողներին, իսկ գովազդի երաժշտությունը նախապես է ձայնագրվել պրոֆեսիոնալ երաժիշտների կողմից:
Հոլովակը հրապարակվել է YouTube-ում Docomo Healthcare Inc.-ի պաշտոնական ալիքում դեկտեմբերի 18-ին: Մի քանի օրում գովազդն ավելի քան 140 000 դիտում է ունեցել:
Moveband 2 թևնոցն աշխատում է որպես քայլաչափ, ներկայացնում է այրված կալորիաների քանակը և քնի համար օպտիմալ ժամանակը: Ճապոնիայում այն վաճառվում է մոտ 67 դոլարով: