Էլինա Հելանդերը՝ Ֆինլանդիայի Տամպերեի տեխնոլոգիական համալսարանից, և նրա գործընկերները PLOS One ամսագրում հետազոտություն են հրապարակել, որում ասվում է, որ դիետա պահող մարդիկ պետք է պարբերաբար կշռվեն, միջինում՝ 5 օրը մեկ: Եթե ուզում եք շաբաթը մեկ անգամ կշռվել, ավելի լավ է՝ դա անեք չորեքշաբթի օրը. շաբաթվա հենց այդ օրը արդյունքն առավել կոռեկտ կլինի:
Մասնագետների ուսումնասիրությանը մասնակցել է ավելորդ քաշ և նիհարելու հստակ մտադրություն ունեցող ավելի քան 40 մարդ: Մասնակիցներին հետևել են մեկ տարի, այդ ընթացքում նրանք կշռվել են 2838 անգամ:
Գիտնականները հստակ կախվածություն են նկատել. մարդիկ, ովքեր պարբերաբար կշռվել են, իսկապես նիհարել են, իսկ նրանք, ովքեր 5,8 օրում մեկ անգամից պակաս են կշռվել, քաշի փոփոխություն չեն ունեցել: Հետազոտությունը, սակայն, չի կարողացել բացատրել դրա պատճառը. կա՛մ մասնակիցները դադարել են կշռվել, որովհետև դիետան արդյունք չի տվել, կա՛մ քաշով չեն հետաքրքրվել նրանք, ովքեր դիետան այնքան էլ լավ չեն պահել:
Ամեն դեպքում, նիհարելու ցանկություն ունեցող բոլոր մարդկանց մասնագետները խորհուրդ են տալիս կշռվել չորեքշաբթի օրերին, քանի որ հենց շաբաթվա այդ օրն է քաշն առավել մոտ իրականին: Ուսումնասիրությունները ցույց են տվել, որ մարմնի քաշը շաբաթվա ընթացքում փոխվելու հատկություն ունի: