ՀԿԵ-ն կրկնակի ավելի կոնցեսիոն վճարներ է անում Հայաստանում՝ բացի այն վնասներից, որոնք ՀՀ կառավարությունն է մասնակիորեն փոխհատուցում: Այս մասին այսօր ասաց ՀԿԵ ՓԲԸ գլխավոր տնօրեն Վիկտոր Ռեբեցը՝ պատասխանելով «Առաջին լրատվական»-ի հարցին, թե ինչու է ՀԿԵ ՓԲԸ-ն վնասով աշխատում և ինչպես է վերաբերվում անկախ պատգամավոր Էդմոն Մարուքյանի բարձրացրած հարցին:
Նա նշեց, որ կոնցեսիոն պայմանագրի համաձայն՝ ՀՀ կառավարությունը պետք է փոխհատուցի ուղևորափոխադրումների գծով առաջացած վնասների մի մասը: Իսկ այդ վնասների ծավալը, ըստ նրա, կախված է ուղևորափոխադրումների ծավալից, իսկ վերջինս էլ ձևավորվում է պատվերի արդյունքում, որը ներկայացնում է տրանսպորտի և կապի նախարարությունը:
«Այդ համաձայնագրի համաձայն՝ տարբեր ժամանակներում տարբեր չափաբաժիններով է ակնկալվում փոխհատուցումը, երեսուն տոկոսից ավելի փոխհատուցում չկա, հաջորդ տարի վնասների 30 տոկոսը պետք է փոխհատուցվի: Ամեն տարի ընկերությունը ներկայացնում է աուդիտորական հաշվետվություն, վնասների հաշվարկ, ծախսերի հաշվում, և այդ աուդիտորական հիմքերի հիման վրա ներկայացվում են փոխհատուցման տվյալները»,- ասաց Ռեբեցը՝ ներկայացնելով վնասների և ՀՀ կառավարության փոխհատուցելիք գումարի թվային տվյալներ:
Նա նաև ասաց, որ Էդմոն Մարուքյանի բարձրացրած հարցին հիմնավոր կերպով պատասխանել է ֆինանսների նախարարության ներկայացուցիչը: ՀԿԵ ՓԲԸ ղեկավարը նաև տեղեկացրեց, որ պարբերաբար գումարներ են վճարվում՝ անկախ հարկերից, այսինքն՝ 2014 թվականի հունվարի 1-ի դրությամբ 2009-2013թթ. ընթացքում ուղևորափոխադրումներից վնասների փոխհատուցման գծով կուտակված պետության ընդհանուր պարտքը կազմում է 818,8 մլն դրամ, այն դեպքում, երբ ՀԿԵ-ն իր հերթին վճարել է 1,7 մլրդ դրամ կոնցեսիոն վճարներ:
Հիշեցնենք, որ ՀՀ ԱԺ պատգամավոր Էդմոն Մարուքյանը գրությամբ դիմել էր ՀՀ Վերահսկիչ պալատի նախագահ Իշխան Զաքարյանին ու առաջարկել Վերահսկիչ պալատի 2015 թվականի տարեկան ծրագրում որպես առանձին թեմա (ծրագրային հարց) ներառել և մանրամասն քննության առարկա դարձնել նաև «Հարավկովկասյան երկաթուղի» ՓԲԸ-ի կրած վնասների իրական չափերը: Առաջարկությունը հիմնավորվել էր նրանով, որ, ինչպես հայտնի է, Հայաստանի Հանրապետությունը յուրաքանչյուր տարի պետական բյուջեից սուբսիդավորում է «Հարավկովկասյան երկաթուղի» ՓԲԸ կրած վնասները: Մասնավորապես, ըստ տարիների սուբսիդիաների գումարն ունի հետևյալ տեսքը. 2011՝ 167 մլն ՀՀ դրամ, 2012՝ 155 մլն ՀՀ դրամ, 2013՝ 328 մլն ՀՀ դրամ, 2014՝ 536,5 մլն ՀՀ դրամ, 2015՝ 496,5 մլն ՀՀ դրամ: Այսինքն՝ 2011-2014 թվականների ընթացքում այդ վնասը կտրուկ աճել էր և մտահոգել անկախ պատգամավորին: