Եղվարդի հայտնի մարզակոշիկների գործարանի տնօրենը լիահույս է, որ հունվարի 1-ից, երբ Հայաստանը լիարժեքորեն անդամակցի ԵՏՄ-ին, իրենց համար նոր հեռանկարներ կստեղծվեն, և իրենք կավելացնեն արտադրանքի ծավալները:
«Հունվարի 1-ից հետո ես հեռանկար տեսնում եմ, որովհետև այն, ինչ հայտարարվում է, քննարկումներ է եղել վարչապետի մոտ, դա հնարավոր է: Մենք կկարողանանք ազատ մեր արտադրանքը վաճառել Ռուսաստանի շուկայում, Բելառուսում, Ղրղըզստանում և այլ շուկաներում: ԵՏՄ-ից հետո քաշքշուկը կվերանա, սերտիֆիկացման հարցը կհանվի, և մի շարք արտոնություններ կտրվեն: Դրանից հետո մեր արտադրանքը կշատանա, քանի որ մեր հզորությունը շատ մեծ է, ու արտադրանքի պահանջարկն էլ կա»,- «Առաջին լրատվական»-ի հետ զրույցում ասաց Միշա Ուլիխանյանը:
Նրա խոսքերով, բացի այդ, եթե Հայաստանում ցանկություն կա զարկ տալու թեթև արդյունաբերությանը, ապա հարկավոր է արտադրողներին ազատել իրացման խնդիրներից: Պետք է լինի առանձին ընկերություն, որը կզբաղվի իրացման հարցերով:
«Օրինակ՝ «Ադիդաս» ընկերությունն արտադրում է իր ապրանքը, և ինքը չի իրացնում, այլ հատուկ ընկերություններ կան, որոնք զբաղվում են իրացման հարցերով: Մեզ հարկավոր է Զիմզիմովի ժամանակվա կուպեցներ՝ միջանկյալ կազմակերպություն, որը կհավաքագրի ապրանքները և կներկայացնի տարբեր երկրներում կազմակերպվող ցուցահանդեսներում ու շուկաներում: Եվ դրանից հետո արդեն իրենք մեզ կպատվիրեն ինչ արտադրել և ինչքան»,- ասաց Միշա Ուլիխանյանը:
Առավել մանրամասն՝ տեսանյութում։