Այսօր նավթի համաշխարհային գները ցուցաբերում են դրական դինամիկա Սաուդյան Արաբիայի էներգետիկայի նախարար Ալի Ալ-Նաիմիի հայտարարության ֆոնին, համաձայն որի՝ համաշխարհային տնտեսական աճը բարձրացնում է «սև ոսկու» պահանջարկը: Այս մասին հայտնում է Ria Novosti-ն՝ վկայակոչելով առևտրի տվյալները:
Երևանի ժամանակով ժամը 07.40-ի դրությամբ՝ Brent-ի փետրվարյան մատակարարումների ֆյուչերսային պայմանագրերի գինն աճել է 1.14%-ով՝ 62.52 դոլար 1 բարելի դիմաց: WTI տեսակի նավթի հունվարյան մատակարարումների ֆյուչերսային պայմանագրերի գինն աճել է 0.90%-ով՝ 58.03 դոլար 1 բարելի դիմաց:
Կիրակի օրը Աբու Դաբիում համաժողովի ժամանակ Ալի Ալ-Նաիմին հայտարարել է, որ նավթի գլոբալ ավելցուկը կապված է Նավթ արտահանող երկրների կազմակերպությունից դուրս նավթ արտադրողների միջև համագործակցության բացակայության հետ: Միաժամանակ, նրա խոսքով, տնտեսության համաշխարհային աճը մեծացնում է նավթի պահանջարկը:
Ելույթ ունենալով միջոցառման ժամանակ՝ Կատարի էներգետիկայի նախարար Մոհամմեդ Ալ-Սադան համաձայնել է իր գործընկերոջ հետ՝ հավելելով, որ ներկայումս նավթի արդյունահանման ավելցուկը օրական կազմում է 2 մլն բարել: Նա նաև վստահություն է հայտնել, որ նավթի գները կկարողանան ինքնուրույն կայունանալ: