Դեկտեմբերի 21-ին համաշխարհային էստրադայի աստղ Էլթոն Ջոնը օրինական ամուսնություն կնքեց իր քաղաքացիական զուգընկեր Դևիդ Ֆերնիշի հետ: Այս մասին հայտնել է երգիչը Instagram-ի ու Twitter-ի իր էջերում:
Զույգը քաղաքացիական ամուսնություն էր կնքել ուղիղ 9 տարի առաջ՝ 2005թ. դեկտեմբերի 21-ին, որն իր տեսակի մեջ առաջիններից էր: Ներկայում միասեռ ամուսնությունը օրինական է համարվում Մեծ Բրիտանիայում, այդ իսկ պատճառով Էլթոնն ու Դևիդը որոշեցին իսկական հարսանիք անել՝ նշում է NEWSru Israel-ը:
«Մենք աղմկոտ կերպով տոնել էինք մեր քաղաքացիական միությունը: Հիմա մենք ունենք հիանալի առիթ՝ օգտվելու նոր օրենքներից ու ևս մեկ տոն կազմակերպելու: Մեր բախտը շատ է բերել՝ ապրելով այս երկրում»,- ավելի վաղ ասել էր երգիչը:
Հարսանիքի արարողությունը անցկացվել է Վինձորի առանձնատանը՝ Լոնդոնի մոտակայքում: Հրավիրվածների թվում էին Էլիզաբեթ Հերլին, Օսբորն ընտանիքը, Բեքհեմները ու այլ հայտնի դեմքեր: Ամուսնական մատանիները տարել են զույգի որդիները՝ Էլայջան ու Զաքարին:
Ավելի վաղ Էլթոն Ջոնի մամլո քարտուղարը նշել էր, որ ամուսնությունը կանցկացվի ընկերական նեղ միջավայրում:
